رسالة ليك ...

رسالة لبنتي الي ما جبتهاش ...

رسالة لبنتي الي ما جابتهاليش الدنيا بعد ...

ممكن باش تلومني برشا كي تكبر و تولي تفهم ... باش تلومني ياسر ... و نعرف باش تكون قاسية معايا شوية ... باش تقلي شنوا هالعالم الكبير الي جبتني ليه ... علاه ماجبتنيش لواقع افضل ... لدنيا احلي .... باش تلومني علي بعض خياراتي ... و باش تدخل في قراراتي ... و باش تحكم علي حياتي ياسر .... و موش باش انجم نجاوبك ... موش باش انجم نجاوبك موش علي خاتر مانعرفش نجاوبك ... اما علي خاتر مانحبش نجاوبك ... نحبك تكون قنوعة .... مفماش دنيا اخري غير دنيتنا هاذي ....

و كان جا عندي القدرة نحطك في واقع احلي ... نحطك في دنيا كلها حب ... دنيا مزيانة ... ساهلة ... ماتلقاش فيها حتي صعوبة ... اما عندنا عالم واحد نعيشو فيه فترة ... باش ننتقلو لعالم ازين ... نحبك تتعلم من تجاربي و تصنع تجاربك ... تتربي انك تقبل بالواقع و لكن تغير المستقبل .... تكون طموحة و ميسالش ماتحطش سقيك ع القاعة ... طير الفوق و طير لابعد حدود قد ماتنجم .... مانحرمكش ... لا مالحلم ... ولا مالعيش ... و لا من الحب ... و حتي الدنيا الصعيبة مانحرمكش منها ... خاتر تستناك دنيا احلي كان عملت مجهودك تو .... نحبك فنانة ... حاذقة و عندك شوية مالفيانة ... نحب نحسك معبية .. معبية حب ... امل و دنيا و تجارب ... نحبكش تسلم كيفي .... و رد بالك تغلط اغلاطي ... باش نخرج انا وياك و نحكيلك علي برشا حاجات ... اما ماغير ما نفرض عليك ... نحبك ذكية ... و في الصحيح عندك ما تقول ... الي يظلمك خوذ حقك منو ... و الي يوجعك اوجعو ... كان تسلم في حقك ياكلوك يا روحي .... ياكلوك الذيوبة و لا يرحموك .... ارحم الناس ... و حب روحك باش يحبوك ... عامل كيما تتعامل .... ماتخافش لا تضحك في وجه انسان و برا قالو مهبولة ... ماتخافش تحب موش عيب .... و موش غلط ... الحب يعلم ... الحب يربي ... ما تجبدش موقفك دافع عليه لاخر لحظة ... و حتي علي قطعان رقبتك ما تسلمش في قرارك ... و في رايك ... حب ذاتك و البس و زين ... موش للناس اما لروحك ... باش تعجب روحك ...

اخترتلك اسم ميرال ...اخترنالك ..... اي عيون الغزال ... باش تلومني و تتمني اسم اخر ... اما حبيت نربطك بالجمال ... حبيت نربطك بالخفة .... حبيت تكون عندك علاقة غير مباشرة بكل ما عندو علاقة بالحب ...
عيش بنتي ... باش كي تموت ما تقولش ما عشتش ... امن بروحك بنتي باش كي تطيح ماتقولش سلمت .... صدق روحك بنتي ... باش ماياثروش عليك ... انا وبوك باش نعيشوك في الحب ... اما كون انتي الحب الكبير .... كون انتي كيما تمنيناك ....

ميرال ... نحبك