تخلقنا... تخلقنا في عالم غوز... باربي... و عروستي... في عالم كلو الوان زاهية و روبة حمرا و تاتي تاتاتو.... ماكناش نعرفو الي احنا في عالم يقولو فيه نشالله فرحة العازب موش الصبية... في عالم بالنسبة ليه مفهوم شرف العرش و العيلة و جد بو خال عم بابا في الي بين سقينا....

في عالم يعاير البنية الي فاتت الثلاثين يا بايرة.... و الي مامشاتش معاها حياتها كزوجة يا مطلقة.... والي مات راجلها يا هجالة.... والي حبت موش بنت عايلة.... ماكناش نعرفو الي نهار الي نتكلمو يسكتونا تي هني علي روحك يا مرا.... والي كي نطالبو بحقوقنا يغشمونا بهوا راجل اما انتي مرا... والي كي نفيقو ماعيناش تي شبي وجهك كي وجه اللوح يا ثعلوبة....

ساعات نقعد نسأل في روحي هاذيا الدنيا الي بقينا 9 شهر نستناو فيها في كرش اماتنا... و ساعات نسال روحي علاه بدعوي اننا نسا يربطونا بحاجات ماخترناهمش.... يحطونا في قالب معين و يمشيونا عليه.... لازمك تكون هكا و تعمل هكا... لازم تاخو ولد عمك متسمية عليه... لازم تكون مزينة باش نقولو مصلي ع النبي.... لازمك تسمع الكلام... و تمشي بكلام الرجال الكبار.. لازمك تكون ديما كيما يحبو هوما.... كيما التصويرة الي صنعوهالك هوما مالي كنت في كرش امك تتشقلب.... والي صنعوها لكل بنية.... علاه خاترك مرا مجبورة ما تضحكش بالقوي... و مجبورة ماتكونش علي طبيعتك و مجبورة تكون رزينة و مجبورة تعرس بالي يحبو هوما باش يتهناو عليك.... كاينو فرحتهم كي يكسرولك كرايم جد والديك....

علاه نعيشو في مجتمع صنع للمرا قالب معين لازمها تكون فيه.... و سيج بدنها بباريار لازمها تمشي حياتها الكل بيه.... علاه علي خاترني طفلة ماعنديش الحق نعترف بحبي خاتر عيب.... و ماعنديش الحق نضحك بالقوي خاتر زادا عيب.... و ماعنديش الحق ندافع علي روحي كي نتظلم خاتر عيب.. و علاش كي مانوصل ثلاثين و مانحبش نعرس يولي عيب.... علاه حبستونا في عيب عيب عيب.... نحب نقلك وقت الي تحب تضحك اضحك و وقت تحب تشبشب شعرك شبشب.... و وقت تحب تبكي ابكي... و وقت تحب تعترف بحبك عبر.... و اعمل الي تحب عليه الكل.... خاترك مرا و تبقي ديما مرا.... و حتي كان ما مشيتش بقواعدهم تقعد مرا...و موش علي خاترها سمعت كلامهم هيا خير منك...

المرا تقعد مرا و كلكم نسا.... و حتي حد ما ينجم يغيرها الحقيقة هاذي.... و حد ما ينجم يفك منك انوثتك.... و ماتسمح لحد يشكك في روحك.... انتي مزيانة كيما انتي.... انتي للات النسا.... كون سيدة نفسك ... كون ملك روحك.... كون سيدة قراراتك... اعفص علي قواعدهم و تعدي... اعمل الي تحب عليه.... اسمع كلام عقلك... تبع ثنيتك ... تبع حلمتك .... واصل دربك.... و حتي كان قالولك عيب و ما يجيش.... وحتي كان رفضوك.... بالسيف عليهم انتي مرا... و للة النسا....