مازلت في بالك ؟ .... مازلت تتفكرني و تقول اك البنية .... مازلت تتفكرني و تتفكر هبالي ... ضحكي و دلالي ... مازلت تتفكر حبي و غشي ... عينيا و حتي تعبي في الدنيا ... مازلت في بالك ؟؟ ... مازلت تتفكرني و تقول كانت ليا ... كانت تحبني ... تهواني ... قلبها معلق بحبار كلامي ... مازلت فيبالك و الا نساوك فيا ؟ ...

فكوك مني ... و كرهوك فيا .... مازلت ؟؟ ... مازلت قلبك يدق كي تسمع اسمي ... وجهك يلخلخ كي تراني ... يديك ترعش كي تمس يديا ... مازالت اك اللهفة ؟؟ ... و الحب .. و القسوة المغلفة ببرشا حنانة .... قلي توحشت القلب الي دقلك و الا نسيتو .... دفنتو و برا حياتك رميتو ... والا في شونك خبيتو ... قلي و بردني ... اجاني و حبني ... نسيني في مرارة فراقك ... و وجيعة غيابك ... زعما تحن ؟؟ .. زعما تدخل ترا تصاوري ... تعشق تفاصيلي ... تسمع غناياتي .. زعما ؟ ... تي زعما علقل تتفكر نومرويا ؟ ... ماجاش لبالك تكلمني تسمع صوتي ... تحسني ... ؟؟ ...

زعما مازلت فيبالك ؟ ... ولا لا تعرفني لا نعرفك ... ولا نسيتني و نسيت كلامي سلامي حبي عشقي و دلالي ... الكبدة مشومة ... وانتي ولدي الي خلاني ... وحيدة نعاني .... من نار جفاك ... و عذاب هواك ... توحشتك يا عمري ... علي قد صبري في الدنيا ... علي قد حبي ليك ... و عمري الي فنيتو فيك ... و زين غزرة عينيك ... و بنة كلامي ليك ... و الحب الساكن في جواجيا و جواجيك .... توحشتك و وحشك بدع بيا .... قتلني ... عمل بعمايلو فيا ... توحشتك و مازلت ساكن فيا .... نار ليل قايلة عشية ... الدمعة علي عينيا ... نخمم في عشير عمري كي خلاها بيا .... مشا .. و ماسالش عليا ....