نعيشو في عالم.. عالم يحب المظاهر... عالم يحكم عليك من لبستك شكلك شعرك عينيك حواجبك يديك و كل حاجة مالبرا فيك... عالم مايخافش عليك... مايخافش عليك شنيا تحس... قلبك كيفاه يتوجع... مخك شنيا يقلك... انتي تتجرح ولا... مايخممش فالكلمة كيفاه تشق صدرك و كي السكينة تتغرس في قلبك... نعيشو في عالم يحكم عليك من نومرو صباطك ولون شعرك ومقياس حزامك و كبر عينيك و صغر خشمك و يفصلك قطعة قطعة وكان لزم يغدرك و يوجعك كلفعة...

تعلمنا في مجتمعنا المزيان اننو لازمنا الكل نكونو قوالب ... كيف كيف... تواما فمنظر وشكل... في مجتمعنا المزيان تعلمنا الكل لازمنا نشبهو لبعضنا... صنادق صنادق... وكان خرجنا ع السرب وقتها خلات.... ويتقال فينا العيب... والي مايجيش والي يجرح بن ادم... نعيشو في عالم قاسي مايشبه لشي... عالم صعيب عجيب غريب... قلبك من داخل و اخلاقك و ثقافتك وشخصيتك يلوحوها فبحر و يشدو في الكاركاس...

العالم المحلاه الي نعيشو فيه تربينا فيه نسمعو كلام جدودنا و نمشيو باقوال الناس و رايهم فينا.. والعادات و التقاليد اهم من قلوبنا و طيبتنا وحنيتنا..... نسينا الي ربي سبحانو باش يحاسبنا ع افعالنا ... والي وقت يصح الصح و نتحطو فميترو قماش ابيض باش نهزو افعالنا و نياتنا وقلوبنا موش شوية شعر و منظر باش ياكلو الدود... نعيشو في عالم مبنو ومحلاه ومعزو .... عالم راي الناس فينا اهم من قيمة قلوبنا واخلاقنا... عالم كلامهم علينا هو الي يحدد شخصيتنا.... عمرنا ماخممنا انو ورا شوية مظاهر و مكياج و شعر فما قلب يخاف ربي و يرا ربي فافعالو.... عمرنا ماخممنا اننو ورا شوية مظاهر فما ثقافة و تربية و تجربة.... عمرنا ماخممنا انك المرا كي تحب توجعها.... وكي تحب تجرحها... شككها في قيمة روحها و جرب احكم عليها م برا...

ان اقوي مافيها ضعفها...علي هذاكا عيشة المرا عمرها ماكانت ساهلة... عيشة المرا في عالمنا المزيان اصعب من عيشة الراجل خاتر للاسف المرا العربية ولات تتقاس بمظهرها لا باخلاقها...
وهنا يظهر التخلف بين الغرب و الشرق للاسف...