حبيت نكتب لبنوتة لتو ماجات للدنيا .. اما نحبها ديجا .. مانعرفش لحقيقة هل ربي باش يرزقني بيك نهار ولا اما نتمني من كل قلبي ... مازالنا ماتقابلناش .. خاتر مازالت عندي حاجات نحب نعملهم في حياتي و نحب نجيبك لدنيا مزيانة تعيش فيها مرتاحة وين تلقي كل شي متوفرلك ... وزادا خاتر لتو مالقيت الراجل الي ماتسالنيش نهار علاه عرست بيه و خليتو يكون بو ليك ..

لتو مالقيت الانسان الي يخليك تقعد حياتك كاملة تراه قدوة و مثال ليك ...

اك المرا الي تاخو في قوتها منك... اك المرا الي كلمة منك تنزل بردا و سلاما ع قلبها الي قعدت سنين ربي تلملم فيه و وجعتو... اك المرا الي تهد الجبل ع خاتر غزرة عينيك... الي تعبت وضاعت وسط النسا.... الي بكات ع مخدتها كل ليلة وهي تخمم فيك... الي صنعت دنيتك نوار و حب و غرام و برشا فرحة و وديتها بقلب بارد حجرة قتلت بيه الطرف الي مازال من روحها... الي تمناتك في منامها و غفوتها و ستناتك ع بابك و لا قالت يزي ولا عييت... الي وجيعتها تهد الهدود و قلعت من قلبها كل ذرة حب و هداتهالك ع طبق ذهب... الي تحملت و صبرت و عيات و شقات م حبك و لا نهار شكات... الي وحشك بدع بيها و قتل الروح لي فيها و باقي تتنفس هواك.... اك المرا الي حلمت معاك و صبرت علي طبعك المعوج و و تخرنينك و دلالك و هبالك و حبت عيوبك و تحملت وجيعة الكلمة.... الي لا نهار خممت في فراق و لا نهار قالت مكتوب ... بنات عليك حاجة مزيانة وسط البرشا خايب لي فيك...

تعرف شنوا الي يغيضني في الحكاية الكل؟ تغيضني روحي... تغيضني روحي الي لدقيقة هاذي ع بابك تستناك... تغيضني روحي الي لفجر ربي هاذي تتمني في كلمة منك... كلمة منك تطمني عليك و تبردلي نار جاشي حرقتني... قلبي ع روحي الي متلهف وجيعة باش يسمع صوتك ... قلبي ع عمري الي ضاع وانا نمني في روحي انك مانسيتنيش والي فترة وتعدي ك ناس ربي الكل...

اخر كلمة قلتهالي اتحملني فترة و تعدي... كانت تسبيلتك باش تمشي... وتفارق روحي... و تبعد ع قلبي... و تحرق عينيا... وتنسيني في اهلي واماليا..

تعديت من نفس البلاصة و شفتها ...

تعديت من نفس البلاصة و شفتها هيا هيا ...

مازالت اك البنية ...

مازالت اك البنية الي في عينيها برشا كلام ...

نعيشو في عالم.. عالم يحب المظاهر... عالم يحكم عليك من لبستك شكلك شعرك عينيك حواجبك يديك و كل حاجة مالبرا فيك... عالم مايخافش عليك... مايخافش عليك شنيا تحس... قلبك كيفاه يتوجع... مخك شنيا يقلك... انتي تتجرح ولا... مايخممش فالكلمة كيفاه تشق صدرك و كي السكينة تتغرس في قلبك... نعيشو في عالم يحكم عليك من نومرو صباطك ولون شعرك ومقياس حزامك و كبر عينيك و صغر خشمك و يفصلك قطعة قطعة وكان لزم يغدرك و يوجعك كلفعة...

تعلمنا في مجتمعنا المزيان اننو لازمنا الكل نكونو قوالب ... كيف كيف... تواما فمنظر وشكل... في مجتمعنا المزيان تعلمنا الكل لازمنا نشبهو لبعضنا... صنادق صنادق... وكان خرجنا ع السرب وقتها خلات.... ويتقال فينا العيب... والي مايجيش والي يجرح بن ادم... نعيشو في عالم قاسي مايشبه لشي... عالم صعيب عجيب غريب... قلبك من داخل و اخلاقك و ثقافتك وشخصيتك يلوحوها فبحر و يشدو في الكاركاس...