نكتب... اي نكتب اما المرة هاذي موش كي اي مرة.... المرة هاذي نكتب بحرقة.... بدموع هابطة شلال... و نشوف في حروفي معوجة.... نكتب و قلبي يوجع... مشوية مكوية.... كان موش متعذبة و نفسيتي منسية.... عينيا ستانست بالدموع....

حتي ولا موش غريب عليها النفاخ و التحويق.... نكتب اي.... اما موش كي اي مرة.... لا نكتب علي حب... لا علي جرعة تفائل... لا علي شوية كلمات .... نودكم بيهم كمسكنات لوجيعتكم.... المرة هاذي نكتب سم هاري... يقتل بن ادم... نكتب في معجم وجيعة... بطعم دموع مالح... مر... حنضل... موجوعة يا رب الكون.... موجوعة و حد ماهو داري بيا.... كان انتي سبحانك.... تعلم الي بيا.... تعلم قداه بكيت دخلاني... وذقت المرار.... وكليت علي راسي.... وقداه حملتها في عظامي و سكت.... وتعلم قداه تمنيت الارض تبلعني و نرتاح... ونرتح خلقك مني.... تاعبة... موش جسديا... اما نفسيا متدمرة.... و جبل علي كتافي.... لا حب يفك... لا حب يبعد و يريح .... نار تكوي... عفست عليها حتي تحرقت و تطفات....

يا ميمة راني موجوعة باش نموت.... بنتك تهز في روحها قدامك.... خايفة عليك... بنتك ما تحبش توجعك و تحير الي بيك.... بنتك لا تحب تبكيك.... و لا تنزل دمعة من عينيك.... بنتك تفرح كي تشوفك تضحك.... ما تحبش تكون سبب بلاويك... بنتك واقفة ع الغصن الشايح... تاكل في السم الهاري.... و تسكت... و تبلع بالغصة.... بنتك نادمة ع كل دمعة هبطت من عينيك.... بنتك تحب تضحكك تفرحك... موش تبكيك... اما بنتك ماخمم فيها حد يحس بيها.... و يخليها ترجع لحضنك و ما تبعد عليك.... ما حب حد يسمعها و يخفف الحمل الي بيها.... ما حب حد يخفف من وجيعتها و يرجعها لاهلها و اماليها.... اليوم بنتك تقرا بعيدة عليك.... لا تنجم تشوف عينيك.... لا تفرح بيك.... و تعدي الي مازال م عمرها بين يديك.... بنتك لا تنجم تتحكم في حياتها و تاخو قرارها و ترجع لارضها .... بنتك موجوعة.... مخنوقة.... يقولولها مستقبلك اولي بنتي.... اقري و ارجع لاهلك وعيلتك وحياتك.... وانا نجم نقرا حرف ماغير دموع.... وانا نجم نرقد ونسكت قلبي الموجوع.... تقلي غيرك بعد و ضحي.... انتي اكثر انسانة تعرف بنتك كائن ضعيف.... لا حول ليه ولا قوة.... لا ينجم يتنفس بلا ما كتف يحاذيه.... بجنبو يسندو باش ما يضيعش.... تعرفني بوهالية يامي و مانجمش نبني حياتي مع البعد.... انتي علي عكس الناس....

كلهم يشوفوني قوية صنديدة.... قلبي كاسح حديد.... دمي بارد ثلج.... راسي صحيح حجر.... اما انتي وحدك تعرفني مازلت نبني في شخصيتي.... و لا عمري خرجت من قشرتي.... وحدك تعرف ظروفي و تعرف لي بعدي عليك مستحيل.... والي وحدي نهبل و نضيع.... نمرض و نتعب.... نكلب و نحبس في بلاصتي لا نقدم.... الي تراوه صالح ليا احباببي.... هوا بيدو ضرني و مازال يضرني.... الي تراوه جنة .... هوا بيدو مالبرا جنة و مالداخل جهنم السعير.... حد ما يعرف حياتي قدي.... و قدراتي كيفي.... انا كي نحب نوصل اتو نوصل.... اما كي نتعذب... ونذوق المر.... والله الموت ارحملي.... تعبت يا دين الالاه.... تعبت و لا عاد نجم نتنفس كي الناس.... اما شنعمل كي تبليت بحب جنوني لامي و بابا... يخليني ما نرضالهمش الاذية.... يخليني نحبهم فرحانين اكثر مني و منك و مالناس الي تقري هاذيا.... شنعمل كي نعيش في صراع بين ضميري و راحة بالي.... شنعمل كي ماعاد شي يحلالي.... اما زعما الي يراوه هوما صحيح هوا بيدو الصحيح.... والا المرار الي ذقتو.... وكمية الحزن الي عشتو.... و المستقبل المجهول الي نرا فيه.... هوا بيدو نتيجة للصحيح الي هوما قالولي عليه...