فرحانة بيك

Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

Ahlem El Mezni - أحلام المازني

نحب نكتبلك ونكتب عليك !! نحب نصيح نغني ونحكيلهم عليك ..

نحب نغنيلك ونعزفلك .. نحب الشتاء تصب ونڨز بين الڨلتة والڨلتة ...

نحب نطلع فوق جبل ونقلك راني نحب فيك ..

نحب نوشوشلك في وذنيك تي راني فرحانة بروحي و بيك ..

محلاها الدنية وانت فيها ، محلاني و أنا معاك ، راك أيامي مزهيها ..

منين جتني وكيفاش طلعتلي ؟؟ لا متجاوبنيش منحبش نعرف !

خليني هكى نسأل ونجاوب وحدي ،

خليني كل وين نراك نسرح فيك ، في ضحكتك و في عينيك ..

ملايكة في بدن إنسان ولا إنسان بقلب ملايكة ..

كيني لقيت روحي لي ضايعة فيك ، كينك إنت أنا وأنا إنت .. تي بربي خليني ساكتة ! ...

باهتين فيا الناس ، يعرفوني باب الحب سكرتو ،

يعرفوني معاش نمن بيه ومنو وليت خايفة ..

جيت إنت ، ومحلاها جية ، هليت عليا كي هلال العيد ،

فرحانة بيك ، كان نلقى ندخلك لقلبي ونسكر عليك ..

نخاف يحزدوني فيك ، نخاف كي نكتب عليك يحبوك من حبي ليك

نغير عليك ، مالنسمة الباردة لي في وجه الصباح طل عليك ،

نغير عليك من الناس ، من صحابك تي حتى من إماليك ..

يا نوارة عيني، راك إنت ليا وانا مانجم نكون كان ليك ..

بقلم أحلام المازني

Tags: