ديمة نبدى ومنكملش

Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

Ahlem El Mezni - أحلام المازني

نعرفش علاش وين نتفكرك ميجي علا بالي كان أول نهارين عرفتك فيهم ،

أول غزرة ، أول تبسيمة وأول ...

كل شي ملول ديمة محلاه ،

يمكن علا هاك ديمة نبدى ومنكملش !

أما معك إنت مش كيف !! لمرة هذي حبيت نكمل ، حبيت الأيامات الكل يكون كيف أول وثاني نهار ..

حبيت اكة الفرحة المزيانة لي كتبتلك عليها تقعد هي بيدها

علاش كل شي جاء بزربا هكى !

عصر السرعة هذا ليحكيو عليه منحبوش أنا ..

فيسع عرفتك ، فيسع دخلتك قلبي؛ فيسع حبيتك ..

أما إنت الحاجة الوحيدة لي زربت فيها انك فيسع قسمتلي قلبي ..

قتلك مالأول متكونش باهي معايا برشة راني نتعلق فيسع بالعباد الباهين ..

إنت سمعت كلامي أما إلا بعد ما فات الفوت

بعد ما وليت أول حاجة نخم فيها كي نقوم منوم

بعد ما وجهك أول تصوير تتصور بن عينية كي نغمضهم

بعد ما ولا صوتك كالدروڨ بالنسبة ليا ..

بعد و بعد وبعد ...

منحبش نقول ندمت وعمري ما نقولها

خاطرك الواحيد لي وصل نهار فرحني بالطريقة هاكي

لواحيد لي قدر الحاجات لي نحبها وعاشها معايا

الواحيد لي حسيت معاه إلي روحي مقسومة شطرين

شطر عندي ولاخر عندو ..

كتبت قبلك برشا كلام حب أما كل منجي نكتب عليك كانت حاجة اخرا

كنت نغمض عينيا نتفكرك كل حاجة فيك كلامك ودلالك ونبدى نتغزل بيك

تي قريب نكتبلك بدم قلبي ، خايفة لا حبار الستيلو يوفى وانا نكتب عليك ..

كتبت على كل شي ، عالحب ؛ فرحتو ، جنونو وعذابو ..

نعرفش علاش أول مرة ورقتي تتببل وأنا نكتب !

ماهياش شتاء ، وماهوش ماء ..

هاذم دموعي يسبقوني وانا نكتب

كاينهم حبو يفسخو الكلام ليكتبتو الكل !!

والفو بيا قوية وما نخرجهم كان بالسيف ..

أما لمرة هاذي هوما لي غلبوني

كاينهم حب يقولولي إكتب فرغ قلبك

أما الكلام هاذا بش يبقى بينا وبينك كهو ..

بقلم أحلام المازني

Tags: