حاير وحيرتني معاك

Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

Ahlem El Mezni - أحلام المازني

حاير وحيرتني معاك ، لا عرفت لا نبعد ولا نضحي بعمري فداك ..

وين ماشية بيا الدنيا !! وين نحب نوصل ووين هازني هواك !!

نقلك ابعدني نحب ننساك ؟ لاعاد نحب نحبك ولا نتفكر أيامي معاك

دقايق تتعدى ، نجريلك دموعي على خديا ، متخلنيش هزني حذاك ..

حاير بيني وبينها ، لا عرفت متحبنيش ولا تبعد عليها ..

كنت خايف من كلام الناس وداركم كان نهار يراوك بلاش بيها

جيتك أنا قلبت كل شي !

ولا لي يراك يسألك عليا قبل ما يسألك على أيامك كيفاش معديها ..

خايف مني وعليها ..

تقلي زعما كان نبعد شنيا يصير فيها !!!

بيني وبن روحي نعرف .. خاطر لي تعدا عليا قبل بش يتعدا عليها ..

نحبك وتحبني أما حتى لوقتاش نقعد نحسب ف سوايع لإنت معها نستنى فيك بش دجيني ..

نحبك وتحبني أما شكون يمسحلي دموعي كي نبدى نتخيل فيك معها ووشكون يواسيني ..

نحبك وتحبني أما شكون بش ياقف معايا كان نهار دجي تقلي يا بنت الناس انسيني ..

نحبك وتحبني ...

استنا الساعة !! زعمة إنت بالرسمي تحبني ولا بكلامك غارني !!

زعمة تحبني ولا عجبك بدني و- زيني !!

زعمة تحبني ولا لاقي الراحة لتلوج عليها معايا ،

نتفكرك قتلي يا طفلة راك في همي تنسيني ..

راني معاك ننسى الدنيا وعبادها راني نحبك رد بالك تخلني ..

أنا وقتها نذوب معاك ونقولك نشالله من قدامك لا ينحني ..

"محلاكم معا بعضكم " تتفكر قداش من واحد قلهالنا !!

تتفكر قداش من واحد يبدا شايخ علينا w قداش قلوب رسموهالنا

نعرف لا إنت تنسا ولا أنا ..

عجبتك هالعيشة ؟؟ تي كيف تقول أمي عيشة الهانة !

نعرف إلي بعد هذا الكل بش نلقى روحي وحدي

بلا بيك وحتى روحي مش بش نلقاها ..

نحب نبعثها معاك ، تحميك وكي تستحقها تلقاها

نوعدك عمري ما نخليها بيك وحتى بعيد عليا كان تطلب عينيا نعطيك

نقولك حاجة تقعد بيني وبينك لا تقولها لا لصاحب ولاغريب

الفرحة لتمنيتها حياتي الكل ملقيتها كان بين يديك

بقلم أحلام المازني

Tags: