حبيت نكتب لبنوتة لتو ماجات للدنيا .. اما نحبها ديجا .. مانعرفش لحقيقة هل ربي باش يرزقني بيك نهار ولا اما نتمني من كل قلبي ... مازالنا ماتقابلناش .. خاتر مازالت عندي حاجات نحب نعملهم في حياتي و نحب نجيبك لدنيا مزيانة تعيش فيها مرتاحة وين تلقي كل شي متوفرلك ... وزادا خاتر لتو مالقيت الراجل الي ماتسالنيش نهار علاه عرست بيه و خليتو يكون بو ليك ..

لتو مالقيت الانسان الي يخليك تقعد حياتك كاملة تراه قدوة و مثال ليك ...

لحقيقة مازلت نحارب فناس و عايلة و مجتمع و العالم الكل باش نعمل الي نحب عليه و نتبع حلمتي لكنني ساعات نخاف نغطس في احلامي و مستقبلي و يجري بيا الوقت و نتحرم منك .. تعرف .. تعرف بالي ساعات نخاف عليك مالدنيا الي باش نجيبك ليها ؟ ,,, كي نرا كمية السلبية و الناس الخايبة نخاف عليك برشا و نقول بنتي كيفاه باش تنجم تتعامل معاهم ..

تعرف زادا .. نخاف من انني مانكونش ام باهية ليك ,,, ام كيما تتمناها انتي كي تكون مازلت في كرشي تتكون.. نحس بحجم مسؤولية وخوف رهيب .. اما في نفس الوقت نتوحش ريحتك الي ماشميتهاش و ايدك الصغيرة الي مامسيتهاش و راسك المزيان الي مابستوش .. تعرف زادا بالي نتمني تاخو مني حتي شوية التمرد الي نعيشو مع المجتمع .. نحبك تكون كيفي تخمم برشا و تسال برشا .. و كي ماتعجبكش حاجة تثور .. نحبك تعرف تقول كلمة لا .. و نحبك تحارب ضد ذكورية المجتمع الي باش نجيبك ليه ... والي مجبور عليك توسع بالك معاه ... نحبك مثقفة تفهم في كل شي ... نحب روحي نولد من رحمي كاتبة ... نحب نعرفك تطرز الكتيبة طريزة بحروف مزيانة ... مانعرفش زادا شنوا قام عليا توا باش نكتب لحاجة مازالت ماتخلقتش و مانعرفش لو باش تتخلق يوما ما ... و تو يقولو ع امك ملا مهبولة و يضحكو عليها زادا ..

لكن مفما حتي انسان فهمني شنو نحب نقول من حروفي.. فقررت اننو نخصصلك حروف تكون ليك ممكن تفهم صدقها يوما ما .. ممكن نوريهالك و تقعد تتفكرني بيها بعد مانموت و علاش لا توريها لصغارك .. الحروف هاذوما ع خاتر البنوتة الي كبرت في قلبي قبل كرشي .. ع خاتر البنوتة الي حلمت بيها و اخترت لها من الاسماء "قدر" .. قداه نتمناها تكون قدري