تعرف شنوا الي يغيضني في الحكاية الكل؟ تغيضني روحي... تغيضني روحي الي لدقيقة هاذي ع بابك تستناك... تغيضني روحي الي لفجر ربي هاذي تتمني في كلمة منك... كلمة منك تطمني عليك و تبردلي نار جاشي حرقتني... قلبي ع روحي الي متلهف وجيعة باش يسمع صوتك ... قلبي ع عمري الي ضاع وانا نمني في روحي انك مانسيتنيش والي فترة وتعدي ك ناس ربي الكل...

اخر كلمة قلتهالي اتحملني فترة و تعدي... كانت تسبيلتك باش تمشي... وتفارق روحي... و تبعد ع قلبي... و تحرق عينيا... وتنسيني في اهلي واماليا..

اتحملني فترة و تعدي... كل ليلة نواسي في روحي بيها.... كل ليلة نبرد بيها في نار قلبي ... كل ليلة نصبر في عمري الضايع بيها...

وستنيتك... ستنيتك تجيني و تقول حاجة تقنعني بغيابك... ستنيتك تحكيلي عالوقت الي تعدي من غيري... و تعمل حد لعذابي و مصيري..

توحشتك و من قلبي نقلع وحشك ... نشم في عطرك بين يديا.... و نشهق بدموع ... وانا ندادي في لياليا و ناديك... وينك فينك كيفنك؟ ...

توحشتك ...

موش ناوي تفك عليا و تبعد والديا و تخطي قلبي و تبعد عليا بعد سما ع وطي و تخرج من قلبي و نرتاح؟ لا نفكر فيك لا تف... انتي اصلا ماتفكرش فيا...

موش ناوي تبعدني تخطاني تفوتني ... و تخرج من مخي وجاشي و قلبي و بدني و روحي و ننساك ونكمل نعيش الي مزال من مكاتيب ربي ؟ ....

شعملنا تو ؟

باش توعدني ماعادش تخليني نستناك و نتوحشك و تعلمني ننساك كيما علمتني نحبك ؟... و نبعدو بالتراضي؟

يا سيدي انا موافقة ننساك وانتي موافق تخطاني اي بعدني عليك! تحرك ! اعمل حاجة ! تصرف خلي حبك يفوتني و نعيش كي اندادي!!

تعبت... اي حاجة خايبة صارتلي في حياتي والي قاعدة تصيرلي تو انتي سبب فيها...

اي وجيعة عشتها و نعيش فيها من تحت راسك..

اي دمعة هبطت من عينيا سببها انتي...

اي انسان بعدت عليه انتي لزيتني...

لوقتاه؟ مازلت موش مقرر وقتاه تخرجني مالي انا فيه و تهز عليا هالحب الي في قلبي ليك و تزرعو لغيري خاترو هدني؟ ...

اي و مبعد؟ تمشي و تحطلي حبك في قلبي و يا ناس ماكان باس؟

اي و انا ! ماخممتش فيا... ماغاضتكش دموعي... ماغاضتكش روحك في الي عملتو فيا...

ماوجعكش قلبك ع الوجيعة الي زرعتها فيا...

وحق ربي تعبت تهديت و مالقيت حل باش ننساك و نقول يزي نسيتو و تعديت...

وحق ربي مالقيت حاجة تنسيني فيك...

نتفكرك كل ليلة و كل صباح و كل عشية و تنزل دموعي...

كيما تو...