Zaineb S. - زينب س

هارون فالكرهبة يمشي سارح بافكارو غارق فالتخمام يخمم في غالية و اولادو و سمر اللي ما بطلتش طلبان و هو ما يهزش ،دار على غفلة شافها ،غالية اي اي هي غالية مرتو راكبة مع راجل اخر تضحك و تغني و طايرة بالفرحة ،ما صدقش عينو ،ريقو نشف عينيه وساعو ،الراجل شكون كريم كريم اللي كان يحبها قبل ،زمر بالقوي و زعمة دخل فالكرهبة اللي قدامو جا بش يخلط عليهم تشد فالضو ،جا بش يحرقو قص عليه كميون مالشيرة لخرا ،زمر عليه بالقوي و الحاكم قحرلو ،هبل ضرب الفولون و بدا يسب ،نار شعلت فيه الدم طلعلو لراسو ،غالية غالية مرتي اللي ما تعرف رجال غير بوها و خوها و انا ،انا كل شي عندها انا اللي حلت عليه عيناها انا اللي ربيتها على يديا باهي يا غالية باهي ،لكراهب بدات تتحرك بالشوية برشا تعطيل ،خرج راسو مالشباك صاح عاللي قدامو

-تي امشي يا بهيم

يقول فالكلام سب و عياط مش فاهم لشكون ولا علاش بين عينيه كان غالية و كيفاش يخلط عليها ،جبد التلفون يكلم فيها ما ثماش ريحتها التلفون مسكر ،مشى لكريمة اختها يمكن يفهم وين مشات يلقاها هي بيدها متحيرة عليها و ما تعرف شي ،عدا ليلة كاملة يدور فالكياس يلوج و يسب مشى حتى لرستورون لقديم متع كريم يلقاه مسكر زاد هبل ...