Zaineb S. - زينب س

نكركر فالفاليزات ورايا ولادي كل واحد شادني من شيرة هارون يرحي فالدخان حاط راسو بين يديه يغزرلي مش مصدق ..

ما حبيتش نمشي لدارنا مش متحملة حتى كلمة ما نحبش نعاود لحكايةو نفسر و نبرر ،تعديت لكريمة اختي فرحت بيا ،حطتلي فطور فالكوجينة و لولاد تلمو مع بعضهم يلعبو

-شنوة بش تعمل توا يا غالية

-ما نعرفش والله ما نعرف شي

-غالية مش صاحبك هذا راو راجلك ثبت روحك عيش اختي

-هذاكا اللي غايضني اما احسن حل هو الطلاق بالتراضي

-وووه طلاق !! و لولاد ؟؟

-شبيهم نربيوهم بيناتنا مرة عندي مرة عندو

-اي ماو لعبة هوما تلعبو بيهم

-بربي يا كريمة ما تزيدش عليا منيش ناقصة ..

طبست عليا

-توا غالية بيناتنا انتي هارون معادش تحبو و تحب اطلقو

-اوووه مله حالة فيك ،هذاكا اللي مازال نقعد معاه بعد اللي صار ،كريمة امبوسيبل تفهم اللي انا حسيت بيه ،نمشي نرقد شوية راسي بش يتكسر

-باهي برا خلي نمشي نطل عالاولاد اش عملو

رجعتلها

-اسمع زعمة محسن راجلك ما يتقلقش ؟

-باللهي برا برا اش يقلق فيه هاو هو فاميلتو كل جمعة يصبو الزيت و امو تضرب بالجمعتين بحذايا ،مله يتقلق هذي

-ههههه مقواك مصاب جيت كيفك ....