Zaineb S. - زينب س

تعدا شهر على آخر مرة شافت فيها أنيس أمها برات و رجعت تمشي على ساقيها و حميدة رجعت شدت القهوة رجعت لحياتها و حوايجها لقديمة و كلامها و تصروفاتها رجعت هربت لحمة ، كيف تبدا حمة تحس روحها قوية محمية أما حميدة تذلها تخليها ضعيفة و موجوعة ...

أنيس ما ثماش ريحتو لا تكلم لا طل تقول ما كانتش نهار في حياتو ولا عمرو سمع بيها لهالدرجة مأثرتش فيه حتى شوي . حاولت تنساه مشى في بالها حكاية ساهلة أما هو سكن عروش القلب و آه مالقلب كان حب ، بدات اتحن خيالو مزال بين عيناها لمستو ريحتو بوستو تعنيقتو توحشت كل تفصيل فيه ، أقنعت روحها اللي عملو مالها الا ردت فعل خاطر مشات و خلاتو من غير تبرير ، يمكن كان نمشيلو و نحكيلو اللي صار معايا يفهمني يعذرني أكيد هو حبني كيف ما حبيتو ، معادش فيها بش تهبل خرجت مشاتلو وصلت قدام المركز وقفت قدام العون ترعش ... تفضل آش حاشتك... خويا نحب انقابل سي أنيس ... شكون سيادتك ... مالعايلة قولو حميدة تو يعرفني ...

دخل بطى شوية لداخل و هي بش ادوخ خافة لا يرفضها .. أيا أدخل يستنى فيك .. دخلت تلقاه قاعد على كرسي ورا بيروه و يلعب بستيلو في يدو متصورتش يستقبلها هكا ببرود هز عينيه بسيف فيها .. إتفضل آش حاشتك... بلعت ريقها بسيف ... أنيس أمان هكا تكلمني شبيك هكا تبدلت معايا .. إنتي السبب.. قربت منو .. والله لا تعرف اللي صار معايا أمي عملت آكسيدون حاجة أقوى مني .. توقعت لخبر يهزو شوية يخليه يحس بالذنب أما شي حجر ميحسش ، قربت أكثر .. أنيس نحبك نحبك و نمووت عليك علاش هكا تعمل فيا ... أنيس واقف جا مقابلها عدا يدو على وجها و عينيه مشات لبلايص في بدنها .... تحبني برشا؟؟؟... جاوبت منغير ما تخمم ... إي والله أكثر ماللي تتصور ...حتى أنا نحبك أما انتي راسك صحيح و ما تسمعش الكلام ... لا والله لا أنيس قوتلك المرة اللي فاتت حاجة أقوى مني .. بعد شوية .. شوف حميدة أنا بش نسامحك عاللي فات أما كان بش تقعد علاقتنا باردة هكا ميجيش ... خزرلها لشفايفها .. نحب مرا مهبولة معايا متخلينيش نخزر لغيرها ... قولي شنوة لازمني نعمل .. قرب شدها من حزامها .. نحبك مرا معايا و مش أي مرا نحب نعيش معاك برشا حاجات.. أنيس مفهمتكش زيد فهمني ... أوووف شنوة حميدة نحكي بالشنوة ؟ بالفلاقي شاهيك شاهيك و بش نهبل عليك نحب نرقد معاك و انوريك اللي عمرك ما ريتو في حياتك أنا نعلمك كيفاش تكون مرا ... تسمع فيه مصدومة متصورتش وقاحتو توصل لدرجة هذي ... ف فاش تحكي هبلت انتي شنوة تستخيلني كيف حاجتك بيا علاش منعرسوش و أعمل وقتها اللي تحب عليه... ضحك ههههه عرس ؟! مش جوي العرس يقتل الحب يا حميدة أما كان تقول إي صدقني نعيشك كأنك مرتي و كان تحب تسكن معايا فالدار منقولش لا.. دموعها هبطت بالوقت .. ساقط مش راجل ... آي أعرف آش تخرج من فمك ... تقولي أرقد معايا زايد في بالي حبيت انسان طلع مثماش فرق بينك و بين الحيوان تخمم كان بنصك اللوطاني لا تعرف لا تحس لا تحب من خلطك في الفساد معادش تعرف تفرق أقعد هكاكه عيش فالحرام من وحدة لوحدة لين يجي نهار و يمشيو عليك الكل و ما تلقا حد بجنبك تفووه عليك... أنيس خاف مالفضايح في خدمتو تصدم في كلامها .. أخرج أخرج عليا لا نباصي عليك ... خرجت تجري جات تحت الحيط في الشارع و اطرشقت بالبكا و الناس تغزر ....

عدات نهار كامل تهوم في الشارع لين عيات جات قدام الدار جبدت سيقارو شعلتو و قعدت عالعتبة معادش عندها دموع بالعكس نقمت عليه اهانة كبيرة حست بيها قداش عافتووو ما فاقت كان بفاروق وقف قدامها هزت راسها عيناها منفوخين بالبكا .. فاروق جيتأقعد.. تتكيف في الحومة معادش مقدرة حد.. . براس منجية أخطاني مش فايقتلك .. هات هنا قتلك .. نطرلها السيقارو من يدها حطو في فمو جبد منو نفس و قعد بجنبها ، ضحكت شطر ضحكة ...فاروق: شبيك ماو لباس نعار الكل قالبه علينا وجهك .. ما بيا شي جيت نشكيلك .. ضربها في راسها .. تي حسن منطقك و اكبس روحك كي تكلمني .. هههه واللهي ضحكتني و لا عيني في ضحك .. فاروق جبد نفس آخر مالسيقارو : حمة ميسالش نسألك حاجة .. منغير ما تسأل حكايتنا وفات ... هذاكا علاش حالتك حالة و نهار كامل ريحتك مثماش ..

دارلها قعد يثبت فيها شوية.. حمة حبيتو ؟ ... هزت راسها ، يعني إي .. عض على شفايفو رمى السيقارو في القاع و عفسو بساقيه .. و أنا ؟؟ ... قعدت باهتة شوية بعد تبسمتلو عدات يدها ورا كتفو و عنقتو ... انت عشيري الغالي واللي في مخك نحيه منغير متركبها لروحك أحنا خوات و بش نقعدو خوااات... أما أنا متأكد من حبي ليك شبيك متفهمش ... فاروق فاش تحكي ماكش ترا فيا مجروحة و تاعبة و موجوعة علاش تزيد عليا انت كيف خويا تعرف عليا كل شي ما نحس بشي معاك تي كان نخرج عريانة قدامك ميهمنيش ... كلامها وجعو و مسو في رجوليتو لهالدرجة ما تحس معاه بشي ، وقف نفض حوايجو و جا ماشي ... فاروق بربي لا تهز خشمك كيف لولاد الصغار ، ما جاوبهاش مشى و خلاها .. حطت راسها بين يديها راسها واجعها ماللي صار اليوم الكل .. حست بفاروق فهمت وجيعتو تمناتلو كل خير برسمي من قلبها فاروق يستاهل كل خير أما هي متنجمش تحس بيه اللي بيناتهم عشرة و معزة مش ممكن تكون نهار عشق و محبة .. فاروق روح لدار مطيقر كلامو محبش يمشي من بالو يلقى عفاف فالصالة تتفرج فالمسلسل .. مزلت ساهرة إنتي لتوا .. هههه مسلسل يهبل إجا اتفرج معايا... هذاكا اللي مزال بطال و نتفرج فالمسلسل ... تي شبيك عاقدها عادي تو تفرج ... تنهد تنهيدة كبيرة .. أوووووف ...سكرت التلفزة و دارتلو .. شبيك فاروق آش ثمة ..حكالها لحكاية لكل عفاف أختو على روس بعضهم بيناتهم عام ما حسهاش تفاجئت كأنها كانت عارفه ... حمة حكاتلك حاجة ...ههههما حكاتلي شي أما أنا فايقة بيك خزرتك فاضحتك ..إي إي إتلم منين ليك هالكلام الكل .. فاروق كان بش تقعد تحاسب فيا عالكلمة مش لازم تحكيلي .. باهي باهي سكر فمك و أحكي .. إنسكر و نحكي كيفاش جات هذي هههه.. إيييه... رما عليها لمخدة بجنبو... هههه أسمع فاروق إنت حمة وين إدور تلقاك بجنبها ديما حاضر هي مطمنه اللي انت ديمة موجود و ما عندك وين هارب خويا لازم تكبس روحك شوية انت باهي برشاااا أما أحنا لبنات منحبوش هكا نحبو اللي يطفينا الله غالب هههه ...و الممنوع مرغوب