Zaineb S. - زينب س

قمت الصباح درت نلقاه بجنبي غزرتلو قعدت نثبت فيه ،عديت يدو على شعرو ،على عينيه على خشمو ،فمو خدودو ،هارون حبيبي عشيري ليوم يوفا اللي بيناتنا لكل ،منجمش نصبر كيفما قالت ميما و كريمة انا اضعف من اني نتحمل نشاركك مع مرا اخرى ،ان شاء الله نجم ننساك و نكمل حياتي منغيرك ،قداش تستنى فيا من وجيعة و دموع كيفاش بش نجم نكمل حياتي منغيرك ...

قمت هزيت روحي بالسيف لبست حوايجي و جبدت زوز فاليزات بديت نعبي في دبشي ،هارون بدا يتململ فالفرش كل مرة يدور على جنب و بعد حل عينيه ماللول ما فهم شي و بعد هز راسو

-غالية صباح الخير

-صباح الخير

-فاش تعمل ؟؟

-نلم في دبشي

-علاش ؟! وين ماشين ؟؟

-انت ما عندك وين ماشي اما انا ماشية انا و ولادي

قام مفجوع جا قاعد

-فاش تحكي غالية

قعدت على حافة لفرش نسكر فالفاليز و عاطيتو بالضهر

-هارون منطولوهاش و هي قصيرة ،انا نعرف كل شي

-اش تعرف شبيك انتي صبحت تحكي بالالغاز

-هارون يزي بربي يزي فيبالي اللي تخون فيا

تصدم و قعد عالفرش و ساقيه عالقاع و حط راسو بين يديه

-تكلم هارون قول حاجة تكلم

قام يدور فالبيت

-شنوة تحب نقولك غالية ..

-تقولي نزوة ،غلطة ،تقول نادم و ناكل في صوابعي بالندم (نحكي ببرود)

-غلطتك انتي يا غالية بعدت عليا برشا ،نسيت قداش نقرب منك و تبعدني ،نسيتني جملة ما تكلمني كان بش تقولي وينك جيب الكوش جيب الخبز شنوة بش نطيب شنوة بش نقضي

حليت فمي باهتة

-هذا كفويا اللي لاهية بداري و اولادي

جبدني من يدي

-و انا غالية و انا وين في هذا لكل مستحق مرا معايا مش خديمتي

عينيا تعباو بالدموع و عصابي فلتت مني

-باللهي ،باللهي هذا كفويا تخوني تخون مرتك ام صغارك ،تخون لعشرة ،عشرة سنين خاطر انا مشنوقة بين دار و خدمة و صغار و انت تروح تحط ساق على ساق و تحب كل شي حاضر و بعد تحبني زادة حاضرة للحكايات

التافهة ..

قرب مني

-ريت شنوة مشكلتك ريت حاسبة اللي بيناتنا حكايات فارغة ،حبي ليك و قربي منك حكاية فارغة

قربت منو دزيتو في صدرو و دموعي هابطين

-تحبني !! تحبني و تخوني شنوة اللي صار ما بيناتكم قولي لميتها لصدرك كيفما تلمني ليك بستها كيفما تبوسني تلعبلها بشعرها تقولك نحبك تتفكرني كي تبدا معاها ولا تنسيك فيا تضحك عليا معاها و تقولها مرتي مش

مكفيتني قولي قولي يا هارون ااااه يا ربي ..

طحت فالقاع على ركبتي ،هبط على ساقيه بجنبي عينيه بدموع

-غالية ،غالية والله لا حبيت غيرك

-سيبني سيبني ما تحطش يديك عليا بش نهز ولادي و نمشي لدارنا و رد بالك رد بالك يا هارون تخمم تمنعني .....