Zaineb S. - زينب س

قربت منو غمضت عينيا ،وين حسيت النفس متاعو على وجهي فقت حليت عينيا مفجوعة من روحي ،وخرت لتالي ،هو زادة دخل بعضو

-كريم ،كريم (صوتي يرعش) شنوة هذا اللي كان بش يصير نسيت اللي انا مرا معرسة ،ولا قول انت فاش جيت انا اللي نسيت روحي ،اكيد تقول هذي مرا مسيبة خلات دارها راجلها و صغارها و جاية مع راجل وحدو لدارو
عينيا تعباو بالدموع

-يزي غالية يزي فاش تحكي ،انتي اللي سامحني ،سامحني غالية ما شديتش روحي ما نجمتش نكون الصديق اللي تلوج عليه انتي هاك ترا مش بش نكذب عليك عايش حياتي بالطول و العرض ،راجل عازب و كل يوم مع مرا و عمري ما كنت صاحب عادي لوحدة منهم ،الدور هذا منجمش نلعبو ،غالية رجوعك حير لمواجع و فكرني في برشا حاجات ،حياتك مع هارون و طلاقك منو رجعولي الامل

نسمع فيه مصدومة

-ريت غالية قوتلك مش انا الصاحب اللي تلوج عليه ،انتي مرا نظيفة ماللي عرفتك تحب راجل واحد في حياتك و مازلت تحبو و انا سامحني مانجمش نكون معاك و ما نخممش فيك ......

خرجت من عند كريم ما خليتوش يوصلني ،معادش نجم نهز عينو في عينو بعد اللي كان بش يصير بيناتنا ،تمشيت شوية ،خممت فاللي صار نهارين بعدت على راجلي حسيت فيهم بفراغ لقيت شكون يملاه يسمعني يضحكني يحسسني اللي مرغوب فيا و غلطت معاه زعمة هذا اللي حسو هارون زعمة هكا ضعف ،علاش يا ربي ،مبهمني هارون عزيزي روحي عشيري لغالي نكذب على روحي ما نجمش نعيش منغيرو و هو زادة ما ينجمش يعيش منغيري احنا روح وحدة قلب واحد عشرة سنين عدينا مع بعضنا حلو و مر توا نمشيلو و نحكي معاه معادش نجم نصبر ،لازمنا نعطيو فرصة لعلاقتنا لازم نبداو صفحة جديدة مش مستعدة نخسرو حتى ولو على حساب كرامتي .....