Zaineb S. - زينب س

كريم:

-غالية شنوة البروقرام توا ؟؟

-ما نعرفش تراه قولي انتي

-اسمع الساعة يلزمني نتعدا لدار عرقت و حالتي حليلة ،نبدل دبشي و نهز شوية فلوس و نشوفو وين نمشيو نعملو سهرية مهبولة

-دار ؟؟!!

-تي اي غالية نتعداو فيسع و فرصة نوريك داري

حسيت روحي مترددة ،ما حسيتش في كلام كريم حاجة بيزار نتعدا معاه و نستناه فالكرهبة و بعد نكملو جونا و هبلتنا ما عينيش بش نروح لدار و نلقى كريمة تعملي درس فالاخلاق و تجبدلي على هارون و الصغار و التضحيات ،ما عينيش بش نروح نحط راسي عالمخدة و نرقد وحدي من غيرو و خيالو بين عينيا ،خليني مع كريم اكثر وقت خير ..

هذاكا اللي صار تعدينا لدارو ،هبط كريم بقيت فالكرهبة ،مشى شوية و تلفت رجعلي

-تي شبيك هيا

-لا برا ميسالش تو نستناك هوني

-تي امشي غالية مراهقين ياخي احنا ...

هبط ساق لقدام و عشرة لتالي ،دخلنا لدار ظلام ،شعل كريم الضو و فيسع لم دبش مرمي فالقاع

-سامحني دار عازب

-ههههه باين

-اقعد خوذ راحتك ،شنوة تشرب

-كان ما بارد

-باهي اوكي...

مشى جابلي الماء و قالي بش نبدل دبشي خوذ راحتك تو نرجعلك فيسع ودخل لبيت مقابلة ،بقيت نتفرج فالدار قمت ندور ،دار مزيانة اما خسارة ناقصتها مرا تنظمها و تعطيها روح ،دخلت للكوجينة لقيت لماعون على بعضو ،انا

مازلت نشوف سارحة مع روحي و كريم دخل

-غالية وينك

-هوني

جاني لابس سروال و عريان مالفوق

-اسمع اما خير شوميز نلبس ولا مريول ..

مشيتلو

-تراه نشوف اممم

حطيت فوقو الشوميز

-البس هذي خير يواتيك اللون هذا

جيت بش نمدلو الشوميز شدلي يدي

-غالية

بلعت ريقي ،قربلي و ريحة لبرفان فايحة منو طبس قرب من وجهي ، من شفايفي .....