وجيعة قلبي ما توفاش

Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

Rahma Jbali - رحمة الجبالي

كي وجيعة بو يوم دفينة كبيدتو يلوجلو ع قبر ... وجيعة قلبي و روحي كي سمعت الخبر

و النّار سكنت جواجيّا و أجنابي تحرقوا ... و كلماتي في دموع دمّ العين شرقوا

لا والفت الدّمع و لا نسيتوا ... و لا هو جاني و لا أنا خلّيته

لا والفت الدّمع و لا بغيتوا ... هو سكنّي و أنا بالقلم خطّيتوا

غصّة في العينين و غصّة في القلب و لليوم ما فهمت يامّي وين الذّنب

قلبي مقهور مذبوح لا عارف يطيح و لا يثور و لا عارف ينسى و لاّ خيال الحلمة يزور

سمعتني الخليلة نبكي وانّاجي لقلبي و نشكي ...

شكون ضربك ... شكون دزّك ... شكون ع الدّمع لزّك !!!

أخطاني، سيّبني ... سحابة و تفوت نااار ضرمت في قلبي و يجيها نهار و تموت

سحابة !!! تي هاي دموعك مطر مغطّيتك للشّطر و قلبك من الهمّ تغمر !؟

ما فمّى شيء ، ما بيّا شيء ، أخطاني سيّبني ما انّجم ننطق شيء

... نار و كويت بيها روحي و ما بقى منها شيء

يعطيه كيّة لي شواك كيف مشى و خلاّك و طعنك في ضلوعك و بكّاك

......... تحبني نحكيلك !!! إيجا آسمع قلبي يشكيلك

كان كالحلمة الزّينة في المنام و ما فقت كان كي لوّن دنيتي الظّلام

موجوعة و نار قلبي و جواجيّا تتكلّم على قد ما كساني وجيعة ما قدرت فيه نسلّم

لا فهمت لا علاش و لا كيفاش

شبينا بدينا و ما كمّلناش !!!

شبينا حلمنا و ما فرحناش !؟

عييييت ... والّه عيت و كليّت و من همّ الدنيا فدّيت و من وجيعة قلبي ما شفيت

تقول عمر سايب .. ريت منّو العجايب .. و هوّ ماهو تايب

عفّس فياّ و رفّس خاطرني على قدّ يديه و معاه ما نتنفّس

عييييت و تعيت و دموع عيني الكلّ سكبت و نكتة من بحر وجيعتي ما كتبت

بقلم رحمة الجبالي

Tags: