نوّحي يمّا و غرّدي بالصّوت

خيالك وليدك اليوم هزّاته الموت

وليدك بمعزاته سارح يغنّي و يقود  

مش داري ع نهاره يوفى و يخلّي ناسه بلا رقود

نوّحي و غرّدي يمّا ذبحتني الهمّال

مش عليّا يمّا على عمري الّي تفنى بين الأجبال

يمّا مش قلتيلي عمر الشّقاء أياموا طويلة !!

مالآ علاش جزّروني وحوش الدّين و ما لقيت ليدي حيله

و جاك راسي لجلمة و لوحولك جثّتي في المغيلة

ذبحوني يمّا و نا شاق الثنيّه ، ما بيت نرجعلك نبكي كالوليّة

نا مبروك نا الزوّالي نا نوّارتك يمّا نا وليدك الغالي

نوّحي يمّا و غرّدي بالصوت

مش عليّا على تونس تغرست فيها أنياب الموت

آبكي على ثورة تونس لي عملها الزوّالي

و آستغنى منها نوّاب المجلس و ركب عليها الوزير و الوالي

غرّدي على تونس و جائزة نوبل للسّلام

خلخلنا الإرهاب و زاد بينا على  قدّام

آبكي يمّا و نوّحي  لو كان الدّمع يواسي

و لمّي حوايجي لصدرك و شمّي فيها أنفاسي