أمي .... حكاية نحكيها بدمعة عين و وجيعة قلب

...نحكيلكم على بنية بنت ستة سنين يتيمة البو بالموت, يتيمة الأم بالدنيا

تحكيلي على خيبتها, تحكيلي و الدمعة تجري من قهرتها

"مات بابا, تضيق بيا الدنيا كي نرى أندادي في حضن البو و ما عندي عيد و لا فرحة بلا خو "

الخو, حب صغري ... خدمت عليه بنت ستة سنين نقضي و نغسل و ديما تحت الساقين قريت أنا عامين باش قرى هو السنين , نشوف الدنيا في الخو من بعد ما توفى البو .

تعدات السنين تجري, كبرت في ديار الناس من دار لدار نجري على خدمة ريت عذابها و ما ريتش بركتها, تاخوها لميمة من راس الشهر لخوه.

جاوها الخطابة, خذات الزوالي قالت قليل و ما عندوا والي ناخوه فقير الجيب مليان القلب يعوضلي عذاب صغري و يدفيلي قلبي

مشات سنين و جات سنين و الضحكة عمرها ما سكنت عين

تليعت و بكات و بقهرتها من العايلة تشوات تحكي حكايتها لصغارها... تحكي فماش ما يطفي لحديث نارها

تقلهم عفسوا فيا خاطرني يتيمة الأم و البو عفسوا فيا خاطرني بالحيا يتيمة الخو

الخو الي ع جالو هبطت دمعتي و تفنات صحتي و مشات ضحكتي أما يبقاو خواتي ههه اي خواتها, خواتها الي تتفكرهم في أعيادها يتفكروها في مصالحهم و خوها اللي يتفكرها ب'ميساج'

في العيد يزي .... تبكي ...تفضحها دمعتها تغدرها قوتها تخونها كذبتها

نعنقها تبكيني توجعني دمعتها تذبحني قهرتها تليعني وجيعتها

نقلها أصبر يا أمي أحنا نعوضوك أحنا نفرحوك ،حنا نزهوك و بصبرك و تربيتك و طيبتك نشرفوك

تقلي قداش مني يا بنيتيو قداش باش ندوم ليكم

الصحة وافية و مشات العافية و القلوب من همومها ماعاد صافية

نوصيك على خواتك, في العين و خلي قلبك ديما عليهم حنين و ما تبعدوش على بعضكم سنين و ما نحبش دمعة بعدي تملى العين

... شوف يا أمي كبرت ... كبرت بصبرك قريت و تعبت و وصلت بصبرك نتعب و تشويني الدنيا نقول اش يجي قدام تعبك قدام صبرك

نحط قدام عيني وجيعتك, تعبك,مرضك,سهرك,همك

" فرحتي بيكم يا بنيتي صبري عليكم أمنيتي نشوف بناتي عرايس و ولدي راجل بأولادو و نموت يزيني ما عيني في الدنيا تزيد تفنيني "

صبرك يا غالية ب قرايتي و أخلاقي و تربيتي نشرفك و فرحني هي أنتي و ضحكتي في الدنيا أنتي و ما فما دنيا بعدك و أن شاء الله نهاري فبل نهارك يا غالية