أنا المرا التونسية ... أنا الحرة الأبية

أنا أم الرجال و صانعة الأجيال ... أنا أم الأحرار و تاج الوقار

اليوم عيدي و عيدك و عيدها... اليوم عيد ينبوع الحنان

عيد نور الدار و بسمتها ... عيد زهوة الدنيا و ضحكتها

......

أنا سر الحياة ... أنا في الغريق حبل النجاة

أنا نجمة تضوي في سماك ... أنا في محبتك و ودك ملاك

أنا البحر و سفينتو ... أنا العاشق و خليلتو ... أنا الحب و سيرتو

أنا اللي تشيد بآسمي الألحان، تغنت بيا الأشعار و غنى هاك الفنان

أنا نجوم أنا شمس أنا قمرة ... و أنا البيضاء و أنا السمراء

......

أنا الغنية و الزواليّة و أنا المرا الحاذقه و المقديّة

أنا بنت الرجال و في وقت الشده نهد الأجبال

لا يغرني جاه و لا مال نمشي بفخرة و دلال

أنا العطر الفوّاح و نور الصّباح والّلي على صدرها تتكّى و ترتاح

أنا الباهية و ماني دونيّة و يدّي في يدّك تتحل كل ثنية

أنا زينة البلاد و أمّ الأولاد و جدّة الأحفاد

أنا اللّي نحمل الهم و بلادي نفديها بالدّم

أنا التفاح الّي يرد الرّوح و أنا الّي نداوي و نبرّد الجروح

........

أنا السّفساري و الخلخال و أنا مولاة البوسة خال

أنا الملية و الخلال و بزيني مذوّبه الرّجال

أنا الشّامخة السّمراء لا نتمثل لا بالشّمس و لا بالقمرة

أنا الّي نصون العرض و بذراعي نخدم الأرض

أنا بنت الشمال و الجنوب ؛ أنا، أني،نا،نايا، هي ،إنتي، أنتوما، ... أنا تونسية، سليانية، كافية، جربية، بنزرتية، جندوبية، صفاقسية، قصرينية، قابسية، نابلية، زغوانية، ساحلية، قروانية، ...

آشهد يا زمان عليا في كل ولاية تونسية نعيش مرا تونسية حرة أبية