لو كان يرجع بيا الزمان التالي راني برشا حاجات ما عملتهمش و برشا حاجات ما عشتهمش مثلا إنت ...إي إنت...

لو كان يرجع بيا الزمان لتالي عمري ما كنت نختارك .. عمري ما كنت نرضى لروحي لوجيعة و نرضى نتحرق بنارك ..

لو كان يرجع بيا الزمان لتالي سوايع و لا دقايق و لا حتى لحظات .. كنت نمحي كل حاجة كانت بيناتنا ، حبنا قعداتنا ضحكاتنا و حتى كلماتنا .. كنت نتفادى معرفتك و الحديث معاك .. كنت نمنع روحي و ما نمرضش بداك ..

لو كان يرجع بيا الزمان لتالي نمحيك نفسخك نشويك نكويك ندمرك و ما نروف عليك باش ما يجيش النهار لي بيديا قلبي نعطيك .. أما كلمة "لو" ماعاد تنفع و ما عاد تنجم تخرجني مالظلمة للضو .. وليت عايشة و مش عايشة .. وحيدة .. هايمة .. طايشة .. نشوف في أحلامي قاعدة بالحلمة بالحلمة تضيع قدامي .. وليت نهرب مالواقع و نتخبى في منامي .. نلوج عالراحة ، نحب نرتاح .. أما علاش فيسع ما يطلع الصباح ؟ .. علاش ما جاتش حياتي لكل ليل ؟ راني نعدي حياتي راقدة و ما نحس هالويل .. علاش .. كيفاش .. لوقتاش ؟ كلها أسئلة أما الأجوبة ما فماش .. و بين السؤال و السؤال قعدت واحلة و ما لقيت الحل .. واقفة على بابي في البرد نستنى خيالك يطل .. أما غيابك طال و إنت لتوا ما جيتش ، وانا ستنيتك ليالي و لتوا ما نسيتش ..