ساعات ...ساعات لازمنا نكونو مخيبنا و ناخذو قرارات في حياتنا تنجم توجع غيرنا ...

ساعات لازم نكونو مخيبنا و نضطروا نبعدو عالناس الكل ...و لازم نبدلو ثنيتناو نختارو مصلحتنا...

ساعات لازمنا نكونو أنانيين باش نفرحو رواحنا ...

ساعات لازمنا نعفسوا على شوية الحنية لي عندنا باش نجمو نقدمو و نعملو حاجة في حياتنا ...

ساعات لازمنا نكونو خايبين باش نفرحو رواحنا... نوصلو لمرحلة إنو نقولوا  يزي ماحبينا الناس و خفنا عليهم ... يزي ماسإلنا عليهم و عاوناهم... يزي ماسمعناهم و كنالهم سند و كتف...

ساعات نفهمو إنو كان فما إنسان يلزمنا نحبوه راهي روحنا... و كان فما حاجة يلزمنا نرحموها راهي قلوبنا... و كان فما حاجة يلزم نتبعوها راهي مبادئنا.... و كان فما حاجة يلزم نسمعوها راهي مخاخنا... ساعات تلقا روحك في عركة بين عقلك و قلبك...

ساعات فما ناس ماتهونش عليك تجرحها.... و فما ناس ماتهونش عليك عشرتها... و فما ناس ماتتحملش بعدها... و فما قرارات ماتتشجعش إنك تاخذها... أما تجرح و تهون و تحمل و تقرر علاه ؟ .... على خاتر هاك النفس العزيزة إلي تتمنى تفرحها ... إلي تستاهل دلالك و حبك ليها إلي تستاهل تغزرلها بعين الرحمة و تقلها سامحني.... إلي تستاهل تبشبش بيها و تسمعها...

ساعات نضطرو نكونو خايبين في عينين أقرب الناس لينا... باش نكونو مرتاحين من داخل... باش هاك النفس العزيزة تتنفس و تتفك الخنقة لي مكبلتها.... أحنا موش خايبين في الحقيقة... لكن لازمنا نكونو أنانيين على خاتر رواحنا شوية.... أحنا في الحقيقة خممنا في أكثر انسان مستحق نكونو معاه و نحسو بيه.... إلي هوا رواحنا.... إلي هوا هاك الصوت الدخلاني... و هاك القلب لي ينبض في وسطنا ...هاك الروح المزيانة ناقصتها لهوة ... و اللهوة موش مستحقتها من حد... مستحقتها من روحك انتي ....