مش بالساهل خذينا برشا قرارات في حياتنا و طبقناهم , مش بالساهل بعدنا على عباد حبيناهم , دفناهم في قلوبنا و عملنالهم عزاء ماحبش يوفى , حدادنا عليهم تجاوز انو نلبسو الاكحل و مانحطوش غناء في الدار و الا مانحنيوش لمدة عام , حدادنا عليهم منع انو القلب يدق , و الا يفرح مع غيرهم , و الا حتى نتخيلو رواحنا مع غيرهم ..

كذبنا و قلنا ناخذو الدنيا من الجانب المشرق , نحكيو على التفاؤل , اما في اول موقف نرجعو لنقطة البداية , اللي قال عليها الدكتور احمد خالد توفيق " في حياة كل انسان لحظة لا تعود بعدها الحياة كما كانت قبلها " على خاتر و انت تضحك بش تكون خايف من البكية اللي بعدها و انت شادد يد انسان عزيز عليك تبدا تتخيل كيفاه بش يعرضك نهار و ماتاقفوش على بعضكم حتى للسلام , اللحظة هذه هي اللي تفهمك الدنيا بالصحيح و كيفاه انك "الوحيد" المصاحب "لروحك" من اللي تولدت للي بش تموت , اما النقطة هذه قد ما هي بش تخليك تنجم تقاوم قد ماهي بش تعبك مادامها مست "الطمانينة " الي فيك .. مست العفوية و البراءة اللي في قلبك ..
" و ليس كل ما في القلب يحكى "