الدنيا عمرها ما كانت خايبة ..الدنيا مزيانة و فيها بارشا حاجات محلاهم ... كيف صوت بوك الصباح و .. ..تعنيقة امك و معاها دعوة من القلب .. بوسة من صغرون العيلة و ضحكة من اول جارة تعرضك في الحومة .. كي تركب في الكار و تعاون مرا كبيرة و تبقى تدعيلك و كي يغزرلك طفل قاعد انت مغصورة يقوم و يخليلك البلاصة ..

الكلمة الحلوة اللي تسمعها في الثنية من عند طفلة و الا مرا ما تعرفهاش كي تقلك "محلاك" ما غير ما تتشوحرك ، و الا اكا الصاحبة البنينة اللي كي تبدا مهنتلة و وجهك مغسول بالماء والصابون تقلك "محلاك حبوبتي" وقتلي انت وجهك يشبه لشئ،كي تدخل زادة روتار للخدمة و العرف يغزرلك و ايڨلك ادخل و ما عادش تعاودها بتبسيمة تفرهد علي الخوف  ، و كي تغيب مدة على عباد يفتقدوك و يتوحشوك ، و اول ما يراوك يترماو عليك و تبدا الضحكة البنينة اللي ما توفاش ، و البروغرامات اللي ما تتكلفش بارشا فلوس اما تعمل شبعة جوء خاتر احنا ملمومين و فرحانين و قلوبنا صافية على بعضها ...

زادة الدنيا باهية كي تطلب السماح من عبد غلطوك فيه و كي ترتاح خاتر السماح عمرو ما كان رخص و الا تطييح قيمة اما اعتراف و تغيير ..الدنيا حلوة كي تتبسم في وجه اي عبد يعرضك و كي تفرح اي انسان حتى بكلمة و الا حتى انك تخليه يحكي و يفضفض و يرتاح ..

دنيا زادة محلاها كي تكون بلاش حقد و بلاش تخمين في الانتقام من عبد ضرك و حكى فيك و وقتلي انت كي يعاودولك تقول ربي يهدي و تتجاوزو و تنسى و تزيد تتمنالو الخير مع غيرك.. دنيا محلاها وقتلي نخزرو لكل حاجة من الزاوية الاخرى .. اللي ما تخليكش ترقدو انت مغموم .. ...بالعكس تعيش نهارك و ليلك فرحان و مرتاح لا تكنبس لا تسب لا تغزل لا متقلق ..حاجة اقوى من كلامهم و من تنبيرهم و من كل شئ .. حاجة تخلي حتى الخايب باهي و الباهي احسن ببرشا .. محلاكم