كيما اليوم .. طفلة صغيرة ضايعة و مش عارفة هيا وين ..الحقيقة حاولت ..حاولت تضحك من قلبها و تنسى وجيعة عندها سنين، حاولت تفرح بعيدها العشرين أما مش عارفة تقدم و تنسى ولا تقعد معلقة بين البينين،، يييييي حتى هو عشرين و اكا العام ولى عندو تسعة سنين ، و مع كل عام تزيد تكبر الوجيعة و تغلغل في القلب ك المسمار ، بنية يا حليلتها و كيفما اليوم أمها جابتها اما خسارتها ما كبرتها و لجدتها عطتها،،،،

كيما اليوم .. نهار اليوم يذكرها في 2009 ، بنية فرحانة برويحتها و فرحانة بالهدية لي أختها جابتها،، فرحانة بلبستها و محفظتها و شاقة البر في العلم تطلب و ساعة ساعة تاقف و تخزر ل لبستها حليلتها.. مافيبالهاش لي بش تمسح دم بكارتها، يا حليلتها كانت اخر حاجة ساترتها،، ييييه الوقت لف لف و منها الفرحة خطف، مارد كبير من اسوء خلايق ربي لف لف و عطاها بكف خشمها نزف و بدنها ضعف ت شفيها من قوة غشيرة تفركح بكعبة حلوى تركح... ت ماو لف لف و الوقت من وجهها الفرحة خطف... لف لف اليوم الغشيرة لي عمرها 11سنة كبرت وولى عمرها عشرين ..... شفتو كيفاش الوقت لف لف... الوقت لف لف خذا منها امها خذا منها بوها خذا منها جدها والوقت لف لف.. كبرت و في جواجيها نار لاهبة ، جمرة دايستها، حاملتها بكفوف يديها و حاملة ليعتها متبننتها..، أما الوقت لف لف و لي خطف منها الفرحة على قريب عمرو يتقصف و خلي يذكر التاريخ و ماو لف لف تو العباد تنسى