نحب نحكي عليك ... نحب نحكي عليك خاتر حاسة بالي فيك ... بالي تحب تقولو جواجيك .... و تحب تنطقو عينيك ... نحب نحكي عليك ... و علينا .. و عليها ... ...

نحب نحكي علي حلمة مزيانة ... حكاتها عينيها ... علي حلمة تمنات تحققها ... تراها قدامها ... علي حلمة صنعت ايامها ... علي حلمة تمنات تضوي ضلامها .. تزهي لياليها ... و تهز راسها قدام اماليها ...

نحب نحكي علي بنية ... بنينة ... حنينة ... كانت تحلم يجي نهار و تنطق عينيها فرحة ... تكون قوية ... و ماتوقفها دمعة .... بنية حلمتها تكون بعيدة ع الناس ... الي خنقوها ... فددوها ... في العيشة كرهوها .... ما امنوش بيها ... ركبو عليها ... و استعارو منها ... علاه ؟ ... خاترها بنية ... بكلام يجرح ... حطموها ... بكوها ... مالدنيا خوفوها .... قالولها ماتنجمش ... ما تحلمش ... ما تخممش ... ما تتكلمش ... حطولها كمامة علي فمها و سكتوها ... بالعاني يحبو يضعفوها ... قال شنيا طفلة اتو تولي خير منا ... تكبر و تتثقف و تغلبنا ... نحب نحكي عليك ... و نقلك انا مؤمنة بيك ... عندك الحق تبني حلمة صغيرة ... و تقطع مع العادات و التقاليد .... الي تراك كان عروسة في تصديرة ... انا مؤمنة بيك ... و نعرف شنوا تحكيه عينيك ....

انا مؤمنة بيك ... و من كلاماتهم يزيك ... و من احلم بعيد .. و راك طفلة ما تنجمش ... و حط ساقيك ع الارض ... و من هني علي روحك ... و من الي تعمل فيه عيب ... عار .. حرام .... نحب نقلك من هذا الكل يزيك ...

نحب نقلك اطلع فوق كلامهم و طير ... تحرر ... تمرد ... و بحلمتك .... الي يصير خليه يصير .... اضحك عليهم كيما ضحكو عليك ... ما تستنا حد يقلك اتو توصل ... و يقلك راك بنية قوية .... بالعكس ... خليك كي ترا روحك تقول صحيح انا مرا مقدية ... قوية ... معلمة ... و شي ما يصعب عليا ....

نحبك توا تقول لكل انسان ما امنش بيك ... انا المرا التونسية البية...

أقوى منك مفماش..