و هما ملمومين عالنار يتدفاو . حطت راسها الصغير في حضن امها و سألتها :" ماما تعرفش علاش النار ما تقربش للما ؟؟ "

قاتلها فكرتني بحكاية كانت امي ديما تحكيها و من حبي ليها حفظتها ، الحكاية بدات

في ليلة من ليالي الصيف و السماء بنجومها مزينة  ، طلت النار من بين الجبال العالية و شافت الما بموجاته الضاوية ، حباته مسكينة و عشقت فيه و لات كل ليلة تمشي بالذمة باش تتفرج فيه قوي و صافي ، مايكيدو جبال ولا وديان .  كل يوم يفوت و حبها ليه يزيد يكبر و يكبر لين جا نهار و تشجعت مشات بخطواتها واثقة قاتله  : "حبيتك و عشقت فيك ، ايجا و كون المعجزة اللي ترجعني للحياة "

هو شاف في عينيها الدفا اللي رجع لقلبه البارد حرارته و دفاه قالها :" او قلبي ليك هدية و نزيد عليه عمري و شوية " .

كل لحظة يعديها معاها يتبخر هو في الهوا و هي شوية شوية تطفى و تتحول لرماد .  

هو خاف ، خاف  لا يتبخر كله في الهوا  و خاف لا النار تطفى و تولي كلها رماد، و شوية شوية ولا يبعد عالنار.

خمم ، خمم و قرر يمشي لبلاد بعيدة و يسيل في ارض جديدة .

النار بقات تلوج عليه ايام و ليالي ، تعبت و ما رتاحت ، تحملت و تمنات غير تراه . مشات و مشات  اما في الاخر تعبت و على الارض ترمات .  و صدفة سمعت غناه هزت روحها بالسيف لين وصلت بحذاه . خزرت في عينيه الصافية  و شافت فيهم نفس المحبة و سمعت من بعيد دقات قلبه تزيد .

في اللحظة اذيكا عرفت اللي الحب ساعات معناه البعاد و اللي البعاد مش معناها الفراق . وقفت  بحذاه و سكتت و في لحظة بين موجاته ترمات و بحبها طفات .

و من يومها الما ولا يهرب عالنار و النار عمرها ما تقرب الما .