عمرك جربت تضحك بالصوت العالي باش تخبي دمعة تحب تهبط من عينيك . تضحك بأقوى صوت عندك باش تسكت الحس اللي عايش فيك .

تحب تقاوم دمعتك مش على خاطر خايف يضحكوا عليك اما على خاطرك تعبت من البكا و عييت .

تبان قوي ،بارد لا يهزك ريح و لا تغويك حكاية . اللي يراك يقول زاهي و الدنيا على كيفك تسير . اما انتي كاتم الدمعة و مش مخليها تسيل .

عندك وجيعة في قلبك مخبيها ، مكابر عليها مهما طالت عليها الايام ماكش قادر تمحيها .

حاجة كبرت فيك من الصغرة ، كبرت معاك و عذبتك . داريتها و على عيون الناس خبيتها اما كل ليلة تطل عليك و تتفكرك ...

صحيح صارت معاك حاجااات و حاجات فرحتك و هزتك لعالم بعيد . حلمت احلام و احلام اخرى مع غيرك بنيت .

اما تدور و تدور و تفيق الوجيعة اللي فيك . و انتي تحاول مرة اخرى تضحك بالصوت العالي باش تخبي الدمعة اللي تحب تهبط من عينيك.

تهرب من روحك . تخاف لا تجي عينيك في المرايا .

تهرب منهم و تحاول بكل جهدك ما تراش الوجيعة اللي فيهم مخبايا.