كان يا مكان في قديم الزمان ورا البحور و تحت الجبال ، بلاد بعيدة فيها الباهي و المشووم . فيها اللي بروحه يفديها و فيها اللي مهما كلا من خيرها باقي ناكر فيها . فيها اللي يحبها اما الظروف قسات عليه لين هج ركب الموجات و سافر بعيد عليها و هو  في قلبه مخبيها . فيها اللي يحسد الكبير و الصغير و فيها اللي يود الناس الكل بالخير . فيها اللي بمخه سارح و فيها اللي بروحه فارح . و فيها اللي همه كان روحه و فيها اللي مشغول على مصلحة البلاد .                                                                                            

و فيها  زادة بيشة اللي تحب فرهود و فيها فرهود اللي  مغروم  بحمامة . الحمامة اللي يحبها فرهود في عينيه مش كما اي حمامة و في عينين بيشة الحمامة بومة مشوومة . حاولت بيشه معاه باش يبعد على الحمامة اما طفاها .  كل يوم فرهود يتبع  الحمامة لين نهار مشا وراها و وصل   لمغارة كبيرة .

دخل فرهود و بقا فيها ايام . كي خرج ولا يكره العباد و البلاد .  البلاصة اللي يحط عليها يده تولي خراب . و الناس كي تراه كاينها رات غراب . فرهود تبدل و ولا ما يسمع كان كلام الحمامة  .  ولا يدور على الناس و يحببهم في الحمامة و يكرهم اكثر في البلاد . تلموا معاه برشا  و  اللي يكره الحمامة في عينيهم غالط  . حبوا الحمامة تحكم البلاد .  اما الناس طردوهم و ما خلوهم يحكموا البلاد . الباهي و المشووم تلموا و دافعوا على البلاد . حطوا اليد في اليد و طردوا فرهود و الحمامة .

الحمامة طارت و لوجت لروحها على عش جديد و فرهود بقا مطيش وحده بين الجبال . الحمامة اللي حبها و كره بلاده على جالها هي اول وحدة هربت و خلاتها بيه. حب فرهود يرجع للبلاد . نادى بيشة و قاللها راني تبت و نحب نرجع بينكم و نعرفك  تحبني  والناس يحبوك ويسمعوك  وانتي باش تتدخلي و ترجعني للبلاد . ضحكت بيشة و قاتله نصحتك ما سمعت و يدك مديتها للخراب و الحمامة اللي غرت بيك خلاتك و مشات . بيشة تحب فرهود   اما تحب البلاد اكثر و تخاف على مصلحة العباد  . مشات بيشة و خلات فرهود و هي تبكي  وتصيح صحيح بيشة تحب فرهود اما تحب البلاد و تخاف على مصلحة العباد .