اليوم باش نحكي على طفل صغير حلمه كبير اكبر من عمره . كل ما يكبر يتمنى مع كل لحظة يعيشها يزرع الفرحة في قلوب الناس . تمنى يزرع التبسيمة على الوجوه ساعات يجيه وسواس يقوله راك محال تقدر و حتى كان فرحتهم ماعندك ما تربح طبيعة الانسان نكار و ما يفيد معاه شي اما هو كان متأكد اللي باش يجي نهار و ينجم يعطي الفرحة للناس كان كل ما ييأس يتفكر ايام زمان و قت كان يشوف جده يزرع في ارض بور و يتعب عليها لا يكل لا يعيا لا يمل لين تعطيه من خيرها و تكافيه . ..

بدا كل ما يشوف محتاج يعطيه من مصروفه و يقسم معاه اللمجة . بدا كل ما يرا دمعة على خد انسان يمسحها و في بلاصتها يرسم على هاك الوجه الضحكة ، ياا ناس شوفوا محلاه وقتلي يعلم العباد كيفاه يحبوا بعضهم و كيفاه يحنوا على بعضهم و يقول ديما اللي مازالت البركة و الحنية عمرها ما تزيد كان الخير و الخيرات السبعة .

صحيح الايام قاسية شوية و صعيبة شوية ساعات تخليك تسلم و تقول حد ما هو مستاهل نتعب روحي عليه ، اما شوف الطفل كيفاه مسمعش للوسواس علاش انت تسمع ليه ،

جرب الصباح كي تقوم ارسم بوسة صغيرة على جبين المرا اللي تعبت عليك و شوف كيفاه بحركة صغيرة تخليها زاهية نهار و طوله .

جرب كي يعرضك صغير و لا كبير تتبسمله حتى كان هو ما صبحش عليك بينه و بين روحه اكيد نهار و طوله باش يدعي ليك .

جرب كي تشوف محتاج تبسملوا حسسوا اللي هوا ما ناقص شي رغملي هوا ناقص كل شي . دفيه في البرد بالكلمة الباهية و و بخزرة المحبة ماك باش تخسر شي .