25 سنة

Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

Ahlem El Mezni - أحلام المازني

25 سنة ، آي اليوم عيد ميلادي

الدينية قداش تجري ، تلمن كبرت قبل وقتي توا فالعمر هذا وليت نحس في روحي عزوزة ..

25 سنة تعدى فيهم الباهي والخايب ..عباد مشات و عباد أخرى خذات بلاصتها

نسينا عباد عمرنا متخيلنا رواحنا نعيشو نهار بلا بيهم

حبينا عباد دخلو لحياتنا على غفلة أما كان مكتوبلنا نحبوهم من قبل ..

25 سنة وكيف أي صبية كل مرت نسمع اكة لجملة " وقتاش نفرحو بيك عاد "

وأنا ببرودة دم " والله أنا فرحانة بروحي تحبش تفرح معايا " ...

سؤال ماست برشة والإجابة أمسط منو . أما الله غالب منلقى كيفاش نسكت فم عبد هم كل عرس ودار ..

راس همهم راجل ، تزديرة ، روبا أرزن مني ، وكيلو مكياج في وجهي

شهر ثنين تي نقول تلاثة نولي معاش نرى وجه ف دار كان مالليل لي الليل

رجل مشي فيبالو فرحة المرى في فلوس ودار وضخمات ...

أنا الراجل هاك منحبوش !! نعدي حياتي بباصة ولا نعيش معا راجل تقليدي

خاطر العرس براجل هاكك مايكون كان حبس أما بهالالتو ..

تعرف أنا راجلي كيفاش نحبو !!

نحبو كيفو هو ..

تي هو لي ديمة نحكي و نكتب عليه ..

نحبو كبير وأحلامو أحلام ولاد صغار

حنين ،قلبو كبير ، وأرهف مالحرير ..

نحبو راجل وبكلمتو ، وكي طيح بيا الدنيا نلقاه

نحب راجل كي نقوم صباح يتبسملي و كي نخاف فالليل بيدو يغمرني

نحبو يكون صاحبي قبل مايكون راجلي

نحبو هكى ليديمة نحس روحي طفلة صغيرة وأنا معاه

هكى لي كيف نقول قالقا يخدم موزيكة ويقول قوم نشطحو

تي ملخر نحبو كيفك و- يشبهلك

في شفايفك ، شعرك لكحل وعينيك الكبار

في خوفك عليا وحبك ليا ...

25 سنة، وهذا أول عام ما نتمناهش يخرج

تي حتى كان بش يخرج ما يخرج كان وأنا معاك ..

25 سنة و هذي أول مرة نبدا نحسب بدقيقة وقتاش بش نطفي الشمع

تيك تاك تيك تاك ...

نص الليل جاء غمضت عينيا وتمنيت " يا ربي ما تكتبو كان ليا "

بقلم أحلام المازني

Tags: