نحبك بالبرشا أما الحب فيك مايكفيش..

نحب ننبت في جنينتك و كل مرة تسقيني بش نعيش..

و نسكن في روحك و كل تركينة فيك.. و بين نبضات قلبك نمشي خطوة خطوة و في كل خطوة نحبك من جديد.. نحب نكبش و في غزرة عينيك نحلم..نشوف ملامحي فيك و نركب جوانح نطير بيهم و نعليك..

نحب ننسى البعد و نتخيلك كل لحظة في جنبي أنا منك و انتي مني.. نشكيلك و نحكيلك في بعدك كيفاش كنت نعيش نحبك تكون قريب كالموت.. تزرب و تخطفني من روحي و ترجعني ليك نحب وجهك كيف نتخيلوا بين الناس و نبقى نتبع في خيالك من بعيد و نشوفك وين مشيت و وين جيت نحب الدنيا كيف تتبدل ألوانها و تورد وقت إلي نسمع صوت أنفاسك من قريب..

نحب كيف نستحقك نلقاك و نزيد نهواك..نحب النسمة و أنا معاك..

نحب تعنيقة على غفلة تنسيني في السنين إلي كانت قبلك و تعدات..

نحب نرسمك بفن نلونك و نفسخك و كيف تحضر تصويرتك نعلقها و ساعات من خوفي عليها نخبيها في حضني و نعنقها.. نحب نراك في مرايتي كل صباح و نزيان.. مانخبيش عليك نحبك أما نحبك تكون قريب مايكفينيش نسمع صوتك و نقرى كلامك.. نحب نشوفك قدامي و نمس وجهك بكفوف يدي.. نحب نطمان عليك و تكون كتفي و حمايتي..

نحبك برشا أما البرشا وحدها ماتكفيش..