Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
كاس المر
Ahlem El Mezni - أحلام المازنيليوم قمت الصباح ، لبست أحلى ماعندي ،
عملت مكياج ، تحسو برشة مكياج مش كيف العادة ،
ليوم خرجت نترشق ف الثنية نتمايل منا ومن غادي ..
ليوم خرجت نتبسم للي نعرفو وللي ما نعرفوش ..
راكم تقول شبيها هبلت هى طفلة ولا صحة ليها فرحانة !
لا إستنو نكمللكم عاد !
مقلتلكمش لي أنا لابسة لينات كحلة ماكلتلي شطر وجهي
محبتش نحيها نهار كامل وكان نلقى نخليها فوق عينيا حتى كي يطيح ليل ...
جربت ناحيتها وغزرت لروحي فالمراية ؛
عينين منفوخين مخيبهم تقول قرصتني نحلة
وجه أصفر من لون البخارة ..
حتى المكياج ما نجم يخبي شي
حبيت نخبي عينين تعبو مالبكاء ليلة كاملة
عينين كنت ماليتهم الفرحة قبل
عينين كانو يلمعو مالحب
تي مازلو يلمعو أما جيست خاطر مليانين دموع
يخي شبيهم يقول الليل يخبي العيوب !!
علاش أنا ميعملش معايا هكك !
علاش ليلة البارح مكذبش عليا وخبال عيوبي
علاش خلاني نبكي ونتحسر على روحي
خلاني نبكي بحرقة
علاش الليل مكذبش عليا كيف ما يعمل معايا النهار
علاش ماقاليش راك قوية !
علاش ماقاليش هز راسك شي ميطيحك !
علاش ماقاليش راي الدينية فانية وآخرتها موت !
علاش يعمل معايا أنا هاك !
معايا أنا بركة ولا زعمة فاضح الناس كل !
الليل ! اه يا ليل !
قداش تحرقت فيك قلوب
قداش من عين بكات وقداش من مخدة بالدموع تعبات
قادش من صيحة خرجت ومسمعتها كان إنت
قداش من آه تقالت وخابيتها بين ثناياك ..
ليوم بش نلبس احلا روبة كحلة عندي
بش نعمل مكياج خفيف ..
ليوم بش نخرج نشرب آخر كاس
نحب نسميه "كاس المر "
ليوم بش نشرب كاس نخبي ونخبك ..
كاس نخب حبنا إلي الدنية وعبادها حكمو عليه بش يموت
كاس حبنا لي بش يقعد حي في قلبي وقلبك ..
كاس الايامات لماهيش بش تتنسى
كاس فرحتنا ، عشقنا ، هبلنا ضحكاتنا وليالينا ..
الليلة بش نكذب أنا على الليل ونقولو هاني أقوى منك
بش نظحكلو كيف مضحك عليا ..
بش نتبسم للعباد كيف ماعملت فالنهار ،
بش نترشق ونخليهم يتغزلو بيا
بش ناقف في وصت الناس الكل
نهز كاسي . وباعلى صوتي نقلهم
في صحتكم كاس المر !
أما توا ماعندي حتى حل كان نلبس اكة لينات الكحلة
هاكي لمخبيتلي وجهي الكل
هاكي لي هديدتهالي و قتلي راي تواتيك
(كينك عارف بش يجي نهار كيف هاك ونستحقها )
ماعندي حتى حل كان نلبسها ونرجع نكذب على روحي و على الناس ..
نرجع نصور تبسيمة صفرة على شفايفي ،
نرجع نعيش نهار إنت ماكش فيه
بقلم أحلام المازني
Website Design Brisbane
Tags: