على قد مانا باش نلعبوها سنڤرة و ذكيين يجي وقت تحس روحك قداكش بهيم..

بهيم في مشاعرك و مبالغتك في محبّة عبد بسالف النظر يستحق والا لا.. ديما نقولو اكيد عندو اسبابو ديما نلتمسولو الف عذر.. لا لشيء فقط بش ما تخسرش لعبد اذاكا..

تحبّو بجهدك الكل و تولي ترضى بالقليل المهم هاني معاه بجنبو نسمع صوتو كي نتوحشو نجّم نراه نعنقو نشم ريحتو نرا تبسيمتو لي ترد فيا الرّوح..

ديما نطمعو بالنهار لي عارفينو ماهوش بش يجي لي يعرف قيمتنا و يحس بهاك اللهفة لي مستحيل يلقاها عند غيرنا.. من عشقنا ليه ما نحبّوهش يخسرنا ما نحبوهش يخسر انسان مستعد يبيع الدنيا و يشريه مستعد يسلم في كل شي على خاطرو.. النهار هذاكا ما يصير كان ما يخسرك بالحق و مستحيل بش يعرف قيمتك مادمت هكا هكا بيه.. ما دمت انت تحبّو ما دام هو يزيد يحبطك.

ما دمت انت تعزّو و ترا الدنيا في عينيه هو بش يعميك و ما دمت انت تحب تحيي فيه الفرحة على قد ما يقتلك عرق بعد عرق و يكرهك في روحك و يخنقك لي انت تتنفس نفس هواه.. العبد هذا ما يحسّك كان ما يخسرك و ما يعرف قيمتك كان ما يعاشر غيرك.. مش باهي تعيش كل شي بقلب و رب خاطر راك على قد ماك بش تحب على قد ماك بش تتوجع.. سيّب عليك و كان جاء فالح راو مالبارح ..

لم اللي بقالك من روحك و قلبك الموجوع و حب روحك زايد تزيد اتعّب روحك و تنفخ ف الجمر الطافي.. رهان خاسر لازمك تقتنع بيه الشي هذا و اللي تهون عليه لازم يهون عليك..

يطوال الزمان و الا يقصار اكيد بش ترجع أقوى بروحك المزيانة و ربي يعوضك ما فما شي بالساهل و الله لا يحسسهم احساس التتليف هذاكا خاطرو ياسر خايب اما تو كي يراوك نهار مع غيرهم تو يعرفو وجيعة القلب و وقتها تكون انت بريت من مرضهم .. اشري روحك و يزّيك ما دافعت و حاربت على علاقات مسمومة .. سلّم يزّي يزّيك ما تعبت و تعذبت .. عزّي روحك فاهم عليه العوض و منّو العوض ...