ضايعة مع المزيكا ؛ مع لي يسميو فيها هوما زنزانا .. حاجة عشقتها وهاني نتبع فيها خلي تهزني وين هي تحب . عمرها ماهي بش تغدر بيا ولا بش تمنيني بحاجة وتقلي مكتوب ..عشقتها كيف عشقي لهوتي بروحي ولا يمكن قد عشقي للكتيبة .. كي نبدى نكتب منحب حد يقص عليا ،حتى كيف نبدا نشطح على الموزيكا إلي نحبها زادا يقول هبلت يقول إلي يحبو .. تي قالو عليا مهبولة كي حبيتو وطلعو فيا البدع السبعة !!

عد نهبل على قاعدة صحيحة خير .. نهبل وانا شادة rouge à lèvre نكتب بيه خاطر ركبتلي وقتها وماعندي حتى حل ، ولا نهبل كي نقوم نشطح على track لي نحبو حتى و- انا بتالون المهم منفلتوش ,

خير ملي نهبل وانا نتبع في حكاية لا عندها أول ولا آخر ، حكاية عادي تضيعلي عمري عادي تكسرني ، كينك كسرت جناح عصفور أول ما بدا يطير ، ولا قصيت ساق طفل صغير أول ما بدا يمشي تي كينك طمزت عين bébé مازال كي خرج من ضلام كرش أمو ..

أما خير نتهز ونتنفض مع كل ضربة باز ، مع كل دخلت ميلودي ولا نعملهم غيرة و stresse !! تي نحب نهبل وانا مغمضة عنية مسافرة من بلاد ل بلاد ،نحب كل ما نشد ستيلو بش نكتب نضيع بن أسطرة الورقة ونضيعك أنت بن الكلمة والكلمة