""تي شنوا تو !!

ماك قلت العيد هذا مش عيدنا، ماك قلت ما ياعنينيش، ماك قلت ميهمنيش وما يساعدنيش   !!! تي ماك قلت تفاهات وريق فارغ !!

ماك قلت إلي يحب، يحب عام 365 نهار ، شهر على شهر وجامعة على جمعة !! ماك قلت إلي يحب، يحب 24 ساعة فالنهار و-60 دقيقة فالساعة !!

قلت ولا ماقلتش ؟؟!!

تراه خمم شوية !! شبيه قلبك واجعك مالا !! شبيك داخلة بعضك عندك ايامات ؟؟  

شبيه إلي يسالك على هالنهار تبدل الهدرة وتقلبها بضحكة ، آي أكا الضحكة الصفرة تع كل مرة !!

شبيك  ضايعة مكش فاهمة روحك ؟؟ عملت فيها ما يهمكش وانتي تستنى في أي حد بش يجي يقولك راني نحبك ..

تي مش أي حد أما الحد إلي انتي تتمنى فيه يكون معاك ، حد كان تلقا تصورو باليد وتصنعو كيف ما تحب انتي ..خاطرك قد ماك بش تلوج مكش بش تلقا ..

اكة الغمة لي على قلبك كي قمت اليوم الصباح خاطرك تعرف ماكش بش تلقا حتى ميساج فيه كلمة نحبك ، خاطرك تعرف مفما حد بش يجيبلك ورد لباب دارك ، لا كادوا ولا حتى كعبة

شوكولا !!!

علاش تتقوا على روحك وتعمل في حيت بينك وبن العباد كي انتي بش توصل للحالة هاذي ؟؟ علاه تبعد على أي حد تنجم تتعلق بيه مادام تعرف لانتي مستحقة لعبد يعنقك ويقولك راني

نحبك في نهار كيف هاكا !!!

هاك قعدت تنصح في فلانة شني تاخو لصاحبها، تعطي في رايك لعلان شنوا لازمو  ياخو للمرا ليحبها !! وصلت تكتب في أشعار خارجة من روحك  بش يفرحو هما بعضهم ..

وانت وين في هذا الكل !! تراه جاوبني وصارح روحك ؟؟

قلي انتي وين ؟؟

انت تحب تحب أما خايفة ، تحب تقرب أما تبعد ،

متشمتة في روحك ؟؟ لا ما نتصورش !!

تي مكش ديما تنصح وتقول كي دجيك الفرصة سيب روحك ؟؟ هاك انتي ديما كابسة روحك ، هاك ديما بانية حيط !!

تي أملص سيب !!!

قادش بش تقعد عاملة فيها قوية وحياتك ماهيش واقفة على رجل !!

تي إي ماهيش واقفة علا رجل متفاهمين !!

أما لازمك حد يملالك حياتك ، لازمك حد  بش كي تقوم في نهار كيف  اليوم تعرف لانتي بش تقوم فرحانة مش مادة وجه كيف هاك !! ""

وليتشي كالمهبولة أنا تو  نغزر فالمراية ونحكي  معا روحي  !!

شنية هالخرافة لنحكي فيها تو !! بش نبكي زادا  ؟؟؟ لا لا مانيش متع الشي هذا آنا !!

هيا البس أكا اللينات، وامشي اخدم على روحك !! لا عيد حب ولا عيد آش يقول فمي !!