تفكرتك ، مديت تصويرة من تصورنا القدم ، حطيتها قدامي ، تنهيدة خرجت مالقلب للقلب ، تنهيدة رجعتني أشهرة لتالي !! تفكرتك وتفكرت أكا الإيامات محلاهم ، تفكرتك وتفاكرت قادش كنت تبدا فرحان كيف نكتب أليك، تفكرتك كيف تبدا تستنا بش تقرالي كالطفل الصغير ليستنى في هدية ماهياش في نهار عيد ! تفكرتك وتحيرت المواجع إلي كانوا متخبيين ، تي تفكرتك ونتفكرك قريب ليا انتي ولا بعيد .. تفكرت ونسال في روحي زاعما آش عامل من بعدي ، قالولي فرحان والدينية زاهيتلك !! صحا لك ! أنا كيف ماخلتني بارشا ناس معاية أما ديمة حسا روحي وحدي..

تفكرتك وتفكرت نهارت عيد ميلادي كيف قتلي " روحي شنية تحب نهديلك ؟" أنا وقتها قتلك منحب شي يزي كيف ربي هداك ليا .. ضحكت مزيانة تصورت الى شفايف أزين وأزين !! نتفكر كيف شديتك من يدك وقتلك هيا سوق وهزني وين بش نقولك ، تبعتني مغير حتى ما تسالني وين ماشين خاطرك ديمة تقول راني عاطي فيك الثيقة ! وصلنا للبلاصة ، نهرتها عيد ميلادي وخطرت أنا نفرح بروحي ، خترت نهدي الروحي أهلا هدية ، هدية نراها قدامي صباح ، ليل وعشية ! تي حبيت هدية تفكرني بيك قريب انتي والى حتى بعيد عليا !! اخترت نوشم اسمك الى بدني تي ماك انتي بطبيعتك لقشة مني !! نتفكر مع دقت الإبرة أنا نصيح موجوعة أما لوجيعة هاكي مادجي شي قدام وجعتي كي بعدت عليا !!! تفكرتك ، تي كفاش تحبني ما نتفاكركش !

تفكرت آخر مرة ريتك فيها مكنتش عملة حساب اكا تعنيقة الكبيرة لي عطتهالي ، جاتني على غفلت ، تي بطبيعتها كل شي معاك كان على غفلة ،كان في رمشت عين !! عنقتك وسرحت معها وذبت بن يديك ، ما كنتش أنا بركا لفرحانة ، حتى انتي ريت الفرحة في عينيك ، نفس الفرحة ، نفس التبسيمة ، نفس التعنيقة ونفس البوسة، متبادل شي حتى بعد أشهر ملي احنا بعاد !!

تفكرتك كيف سمعت غنايتنا ، كي مشيت في ثنايا كانو مليانين بضحكاتنا ، تفكرتك كيف طاح ألليل وكيف الشمس طلعت من ورا الأجبال ، تفكرتك كيف طلعت القمرت وكي هل الهلال ، تفكرتك كيف البحر هايج وكيف يبدا أصفى مالزيت ، تفكرتك كيف الطقس بارد ونهرت لي بسخانة الشمس تكويت...

تفكرتك ، تفكرت هاك الإيامات ، تفكرت ستيلويا ووريقاتي ، تفكرت كيف نبدا نكتب عليك هاك النسمة الباردة لتدخل و تقشعرلي سويقاتي ،.. توحشت نكتب أما نخاف على مدة الستيلو أول كلمات نكتبها اسمك ، نخاف لا نلقا روحي نكتب في كلمة توحاشتك ... علاش بعد المدة هاذي الكل نرجع نخامم فيك ، علاش الحاجات لنرا فيها الكل مربوطة بيك !! فيبالي حكايتنا نسيتها ، في بالي صفحة ومن أكا العام طويتها .. فيبالي عرفت غيرك بش ننساك ، لقيت روحي نحب فيك أكثر من أكا الإيامات...

فيبالي لهيت روحي ببرشة حاجات ، أما ولا حاجة تنجم تنسيني في روحي لي مشات ..فيبالي عيني نشفوا مالدموع والشفايف والفو التبسيمة ، فيبالي رجعت نتنفس وتنحات أكا التنهيدة، في بالي كبرت وماعاش نخاف مالضلام ، تي فيبالي نسيتك وماعاش بش نشوفك حتى فالأحلام...

مافباليش بش يجي نهار ونرجع نكتب عليك ، تي نكذب على روحي وكذبت عليك..

في لحضة التليفون تمد ، مساج تبعث ، مكنتش نتصور إلي فيساع بش نلقا الرد !! كلمة وثنين وتلاثة ... 9 سوايع بالحساب نلقا روحي مرة اخرى معاك...