فما برشا ناس موجودين في حياتنا كيما وجود الدخّان، الشكلاطة، القهوة، و ماكلة الشارع.. تغرنا بنّتهم السطحية و نوليو مدمنين عليهم و ما عادش يهمنا في المضرة ننساو الحقيقة و نغمضو عينينا على العيوب باش نجمو نكملو نعيشو معاهم كيما مطر الشتاء نمشيو تحتها و نفرحو كيما الصغار كيف نتبلّو و ما نندمو كان في الليل وقت تطلعنا السخانة و تشدنا الكحّة..

فما ناس في حياتنا نحطوهم من أولوياتنا نتجاوزو أغلاطهم و نكسرو قواعدنا الكل على خاطرهم أما الناس هاذوكم هوما بايدهم اللي يكسروك و يخليوك لا قواعد ثابتة و لا سقف صحيح..

الناس هاذوما لازمنا نحاولو نتعرفو على ملامحهم من يوم ما ندخلو معاهم في علاقة تلقاهم يجيوك كان كيف يضعفو و تلقاهم كيف إنت تتعب يقولولك هيا بالسلامة لين ترجع لباس.. تلقاهم كل ما انت تقرب يبعدو و كيف تاخذ قرارك باش تبعد عليهم يكبشو فيك بايديهم و ساقيهم.. على خاطر عارفين كان انت تتحملهم تتحمل هبالهم و بكاهم.. هذا شمعناها ناس toxic ناس لا يعيشو معاك عيشة بنينة و لا يسيبوك تعيش حياتك بلا بيهم..الناس هاذم شيء معاهم ماهو كامل كل شيء نص نص.. اكحل و أبيض.. لا نحبك و لا نصبر عليك.. لاني معاك و لاني عليك.. لا نقربلك لا نبعدني عليك..

ديما يحاولو يعطيوك فرصة إنك إنت لي تقرب باش بعد يقولولك احنا ما عملنا شيء انت المسؤول على تصرفاتك.. ما يوعدوكش إنهم باش يبقاو معاك باش وقت لي يخليوك و يمشيو يقولولك احنا ما وعدنا بشيء.. الأشخاص هاذم لازم نظفو حياتنا منهم قبل ما نلقاو رواحنا ضيعنا برشا وقت على خاتر حاجة اشطار اشطار و عمرها لا باش تكمل.. عمرنا لا باش نفرحو بيها.. حاجة وجيعتها أكبر ببرشا من البنة متاعها.. الناس ال toxic لازمك تعض على قلبك و تخرجهم من حياتك.. مهما كنت تحبهم لازم تخرجهم من حياتك باش تنجم تعيش مرتاح باش تنجم تعيش حياتك كاملة مش نص نص..