Zaineb S. - زينب س

مشيت لدارنا حليتها نلقاها ظلام ،ناري على داري مستانسة حية بينا بحس صغارنا ،درت فيها ،قعدت فالصالة نستنى في هارون وقتاش يروح ،ما حبيتش نكلمو حبيتها سيربريز ،انا هكاكا و باب الدار ينوقز ،قمت حليت نلقى مرا تعمل فال 30 قدامي

-تفضل مدام ،بشكون حاشتك

دخلت بعضها وجها لخلخ

-لا سامحني غلط فالدار

جات هابطة فالدروج قولتلها

-انتي هي

دارت و عينها فالقاع

-و انتي مرتو ؟؟

-زعمة شكون غير مولاة الدار الدار تنجم تحلك لباب

-شوف سامحني ما فيباليش بيك فالدار يا مدام

دارت جات ماشية

-تتصور ما ثماش كلام لازم نحكيو فيه ؟؟

-ما فيباليش بيناتنا كلام

-تنجم تدخل ما تخافش ثمة مستوى ما نهبطش عليه

قعدت تخمم شوية ،و بعد دخلت قعدنا مقابلين بعضنا ،قارنت روحي بيها هي وين و انا وين فرق كبير قداش لاهية بروحها تمنيت نقوم نجبدها من شعرها نبرد قلبي فيها اما تربيتي و اخلاقي منعوني .....

-نحب نفهم شنوة ناقصك شنوة اللي يخلي طفلة كيفك تصوحب راجل معرس و باولادو نحب نفهم كهو

سمر ساكتة و راسها فالقاع تفرك في يديها مالستريس

-تعرف اش عملت فينا تعرف اللي بش تفرت عايلة كاملة

-ما ضربتوش على يدو راجلك هو زادة يحبني

-ههههه يحبك !!! مثبتة ؟؟ اللي بيني انا و هارون اكبر مالحب اللي بيناتنا عشرة ذكريات مشتركة دموع فرحة اللي يوجعو يوجعني و اللي يوجعني يوجعو انا امو اختو صاحبتو حياتو لكل هارون ما ينجمش يعيش منغيري حتى كان

هو ماشي في بالو ينجم ..

هزت حواجبها و غزرتلي

-ماله هو كيف يحبك هكا علاش خانك معايا كيف انتي ماليتلو عينو

-انتي بالنسبة ليه مغامرة حلوة تبديل جو تكسير روتين و اول ما خرجت لحكاية لضو طفات مساطت و يضهرلي هذاكا علاش جيت تلوج عليه هوني

-شكون قالك مش هو مرندفني في دارك

-نعرف خاطر نعرف و كهو اما ما فهمتش كيفاش ترقد فالليل و ضميرك مرتاح تبني في سعادتك على تعاست غيرك

حسيتها تشجعت

-علاش بش نتقلق زادة راجلي طلقني خاطر مرا جديدة دخلت حياتو و حبها علاش انا لا شبيه انا ما خمم فيا حد

-و انتي حسب ما فهمت قاعدة تنتقم من مرا اخرى سرقتلك راجل في وحدة ما تعرفهاش ولا تعرفك

-لا مش هكا اما انا زادة حبيتو هارون و هاو نقولك مانيش بش نتنازل عليه ...

كلامها لخر وجعني جيت بش نجاوبها نسمع في صوت مفاتح هذي تشقشيقت هارون ،قمت مفجوعة

-امان تخبا ما نحبوش يراك

هي زادة دخلت بعضها و تخبات ورا لباب ، حل هارون لباب شافني دخل يجري وجهو احمر خطفني لصقني للحيط ما نتبهش لسمر جملة

-طحان ترا فيا اه حل فمك طحان قدامك

-اي اااي هارون شبيك سيبني اش صار

-تسأل تسأل ريتك مع حبيبك لقديم تتشيطح في كرهبتو طايرة بالفرحة و تحاسب فيا انا

زاد كبس على رقبتي وليت نكح و وجهي حمار

-يا هارون والله لا صار شي اي اي سيبني بش تقتلني

-تكلم تكلم راني بش نباصي عليك

خفت منو بالرسمي

-والله ما ثمة شي قابلتو بصدفة حبيت ننساك شوية ما ثمة شي

بدا يرخف يدو تشجعت عليت صوتي

-انت كي تخوني ميسالش حلال علينا حرام عليكم اما اما لمرا حتى كان ما عملت شي تتنصبلها لمشانق

-غالية سكر فمك والله نقتلك و نقتلو قبل ما يخمم يحط يدو عليك مهبولة انتي كان تخمم بش نخليك لراجل اخر

-ماله علاش تخون فيا علاش سيبتني حتى انا نشوف حياتي

-يا غالية شبي ** ياخي تنطق فيا (رجع كبس عليا ) متاعي متاعي انتي ما تفهمش غلط غلط نزوة و مشات على روحها اعمل فيا اللي تحب اما تخمم في راجل غيري والله نباصي عليك (شدني من شعري ) يمس شعرة

منك كانو راجل

فرحت تبسمت

-مازلت تحبني ؟؟

غزرلي لفمي

-قيبالي السؤال هذا تجاوزناه

قربت منو غزرت لشفايفو نعرف نقطة ضعفو

-ما عادش لازمنا نتجاوزوه

-اش تحب انتي توا

-نحب نسمعها

-مازلت منرفز عليك

-نعرف كيفاش نرضيك

قربت منو و ذبنا في بوسة كلها وحش و وجيعة و غش .....

سمر في تركينة شافت و سمعت كل شي غالية ما كانتش مستحقة تجاوبها الاجابة جاتها واضحة و كافية ،هارون ما شافهاش خاطر عينو كان على غالية و غالية نساتها ولا يمكن حبت تجاوبها بطريقتها ...خرجت تجري مالدار

عرفت سمر اللي ما عندهاش بلاصة في قلب هارون ،ما عندهاشش بلاصة خاطر عشرتهم ..عشرة لعمر اقوى منها ...

غالية سامحت هارون ،رجعت لدارها لراجلها و صغارها ،صلحت من روحها برشا اللي صار رجع الحب لقديم اللي بيناتهم و عرفو اللي شي ما يفرقهم ،اما غالية سامحت و ما نساتش لبلار اللي يتكسر تصلحو تلمو اما اثار

التكسير يقعد باين كيف جرح غالية اللي خلاتو للوقت يداويه ...و هذي هي حلو و مر حتى يتعدا لعمر ....