Zaineb S. - زينب س

خرجت غالية مالدار ،هارون يرا فيها هازة ولادو في يديها و ما نجمش يمنعها مكانش عندو عين يقابلها بيها و مش فاهم روحو مازال يحبها ولا لقلب برد عليها مش عارف غايضتو ولا غايضو حالو ولا غايضتو عشرة لعمر اللي بيناتهم وصغارهم اللي يجريو بين ساقيهم ..

دخل لدوش حل لماء لبارد و دخل تحتو ،يمكن لماء يبرد نارو ..خرج لف منشفة في وسطو ،تالفونو يصوني جرى قلبو ضرب زعمة غالية ندمت و تحب ترجع ،هزو يلقاه مكتوب عالاكرون سمر ..سمر صاحبتو ،رمى اللفون فوق الفوتاي و تكى بجنبو عينيه فالسقف ،مش فاهم شي ،شبيك هارون شنوة تحب غالية هاي مشات و سمر جايبة ما عندها تطلب و مستعدة تكون عندك وقت ما تحب مش هذا اللي تحب عليه

سمر تذكر اول نهار شافها فيه ،في ليلتها تعارك مع غالية ،متوحشها قربلها فالليل حب ياخو حقو نبزتو (هارون تاعبة والله نهار كامل في جرة لولاد ياخي شبيك اناني )

اسهل تهمة عند غالية هي الانانية ،عطاتو بالضهر و رقدت ،في بالو خذا مرا يحبها بش يعيش معاها فالحلال ،هبلتو و جوو وقت ما يحب عليها يلقاها ،ما يحبش لحسابات برشا يحب يبوسها و هي تغسل فالماعون فالكوجينة و يدها بالرغوة ادورلو تعنقو و تبوسو من رقبتو و تمسخلو شعرو بالماء و تضحكلو ضحكة زعبانة و يصير كل شي منغير بروقرام و تخمام ان شاء الله حتى فالكوجينة ،غالية تبدلت و ولات كيف النسا اللي كانت تضحك عليهم قبل ما تعرس و تقول انا امبوسيبل نكون مرا تقليدية ..(هارون توا ما يجيش معادش وقت نصبح نخدم نمشي تاعبة ،هارون علاش هكا دخلت بسباطك مسختلي الدنيا ،تي تعنق فيا و انا نطيب خلي نكمل قبل ،ااااوه ما تتكيفش فالبيت قوتلك الدخان لبرا ،شبيك تحكي هكا قدام فاميلتي ،شبيك قولت هذيكا ،شبيك عملت هذيكا ) نسات اللي هارون راجلها مش ولدها اللي تربي فيه ..خرج منرفز الصباح بعد اللي صار بيناتهم فالفرش ليلتها ، صارت غلطة فالخدمة مالكليون اللي يتعاملو معاه مشى هارون بش يشوف شنوة لحكاية قالولو اتفضل الريسبونسابل مدموازال سمر تستنى فيه دخل في يدو الفاتورات ،سمر هزتو و حطتو و هي قاعدة ورا البيرو متاعها عجبها من اول نظرة هي زادة مش شوية زين و عين و بدن مستوي غلطة لا من نوع النسا اللي تتلهى بأبسط التفاصيل و ما تنسى شي ،مكياج ريحة بارفان تشمها من ورا لباب و صوت حنين دافي فيه برشا فيانة ..
قامت لابسة شوميز بيضة و جيب اكحل قصير و محزوق و سباط تالون اكحل ،مدتلو يديها

-سي هارون من شركة *** مش هكا ؟؟؟

-اي

-تفضل ارتاح

بقاو يجي ساعة يحكيو عالخدمة ،وبعد بداو يبعدو عالخدمة و دخلو في مواضيع خاصة ،شنوة قريت شنوة عملت و ستدعاتو سمر على قهوة لبرا مالشركة بش يكملو يحكيو فالخدمة ،استدعاء بريء باسم الصداقة و الزمالة ،و لمور اطورت من قهوة ولات قهاوي فطورات تلفونات ...

هارون هبت نسمة في حياتو حاجة جديدة مرة لاهية بيه تكلمو في اي وقت تسالو على كل تفاصيل نهارو و ما تملش منو و فوق هذا الكل كانت تعرف اللي هو معرس و ما عارضتش هذا ،هارون ما كانتش نيتو يخون غالية ،غالية لهوا اللي يتنفسو اما حاجة قوية عليه ما نجمش يقاومها ،كان ضعيف بعيد على غالية برود كبير في علاقتهم ،سمر زادت حطت الملح عالجرح ملات لفراغ اللي عايشو مع مرا يحبها و عايشين تحت سقف واحد ،ما نجمش يقاوم اهتمام سمر ،زينها كلامها ،الضحكة ديما على فمها ،منغير ما يشعر لقى روحو في علاقة معاها و ما عرفش يخرج منها ولا يكمل فيها ....