نوقزت المنقالة..07:00..غزرت لليومية 20/12/20..30سنا.. اليوم اول نهار في النص الثاني متع العمر!! غزرت للشباك..السما مغيمة كيما نحبها.. العمر قداه غدار..حاجتين خلاوني نركز ساقيا عالقاع، ريحة القهوة و صوت ام كلثوم جايني من الشباك،جارتنا كالعادة حاطة ام كلثوم عالصباح..ما نعرفش كيفاه هالمرا عايشة وحدها ليها سنين..هاذي اكثر حاجة مخوفتني و خلاتني سكتت كي امي لبارح قاتلي فما شكون تكلم عليا و يحب يخطبني..اول مرة ما نعمللهاش عركة "مو قتلك ما نحبش نعرس هكة!!"..

من بيتي لبيت الحمام ترهوجت مرتين..قدام المرايا وجه مزيان مهما حفرت فيه السنين..عينين التحويق ما طفاش اللّمعة لي فيهم.. خصلات شعر منثورين و ثايرين عالتلاثين الي ما نعرفش كيفاه وصلتلها! محبيتش نثبت ياسر خفت لا نرى شيْبة جديدة.. يخوّف العمر! تران مزروب.. فرس هاربة بيك.. حفنة رمل بين يديك.. و برا عملت 30 سنا لازم ناخو اي ماخذة؟؟  علا صوت ام كلثوم و هي تقول "واحنا مش هنعيش يا روحي مرتين" صبيت قهوتي و مع الرشفة لولى تبسمت و سرحت..

انا عشت حياتي كيما حبيت و شتهيت هبلت٠٠ضحكت..شطحت٠٠ حبّيت٠٠ شخت٠٠ مالازمنيش نجي لاخر العمر و نفسدو و نكمل بقية هالعمر نحل عينيا الصباح على راجل ما نحبوش و كل ما نتفكر الي انا ماخذتو قلبي يعصر عليا  و الله اعلم تدورش بيا الدنيا و ترصيلي في عشقة عقاب العمر!! ماو القلب الفارغ يجّم يعاود يدق في أي وقت،و ما يكبر في عينو شيء!! "هند ما تنساش شقتلك، اليوم بش يكلمك" جيت بش نقلها لا تفكرت اك كعبتين الشيب لي يمكن ياسر يطلعوا تكاثروا "اسمعني، اسمعو و تبداش تهرب فيه ماني نعرفك،و ما تبداش تجاوب كلمة و قص و رد بالك لا.." اووووه مش لازم هالقهوة.. هاني تلفت!!

خدمتي ..مالاحلام لي وصلت حققتهم،كيما برشا حاجات اخرين..اما مزالوا برشة احلام اخرين زادة مقيدين في زمام المستنية منهم اني نقسم حياتي مع راجل نحبو نعملوا برشا حاجات مبعضنا..ليسة طويلة متع حلمات..بلايص و هبلات نتمنى نعملهم معاه ..اكيد الراجل هذا مش بش تجيبهولي خالتي ولا بش تراني امو في عرس ! على هاكا أي واحد كان يجي بش يخطبني ستيل قاتلو عليا عمتو ولا راتني خالتو كنت نرفض من غير ما نسمع بقية حكايتو ما نمش انو زوز مالناس يقعدوا قدام بعضهم و يقولوا هيا نحبوا بعضنا و العرس عندي انا دار مزيانة الساس لول متاعها الحب و ا پار هذا الكل ما نحبش انا نمشي نقعد في قهوة نتعرف على واحد و يبدا يقلب فيا و يسال فيا : "انت تعرف تطيب" طباخة متع والديك.."و شهريتك قداه" داخل على طمع!! تقعّد!! أي مالا شلزني المرة هاذي وافقت اني نقابلو؟! سكتت..

نحس الرجال هاذم لي ياخذولهم اماتهم هوما يحبوا يعرسوا و يبداو يلوجوا على مرا مواصفاتها مطابقة لليستة متاع سيادتو معناها يختارك خاطر فيك مواصفات معينة مش خاطرك "انت" ! معناها فما الفين نسخة منك معاناها مش يحبك اما تساعدو يختارك كيما يختار كرهبة و الا تليفون و الا منقالة..انا الناس هاذم منجمش نتفاهم معاهم !! انا كي نمشي نشري أي حاجة لازم نحبها ملي في الفترينة و مبعد نتلفت للخصائص متاعها خلي بش ناخو راجل..

"يا بنيتي راو عمرك قاعد يتسرق منك" اما انا حاسة الي انا سرقت منو برشا ايامات مزيانين  يمكن امي ما تفهمش شمعناها تسرق من عمرك ايامات، ما تعرفش شمعناها تعيش كيما تحب،و تعيش ليك انت، و تاخو الراجل لي تحبو انت مش تاخو خاطر "وقيت" وتاخو بش ما يقولوش عليك "بايرة" !!

اما بيناتنا٠٠أنا وليت نحس الي لازمني راجل بجنبي، ووليت خايفة لا نكمل حياتي وحدي.. هالدنيا صعيب تفارعها وحدك و قداش منها القوة! اش كان عليه لوكان مشيت شفت هالراجل  بالك هو الي مكتبهولي ربي بالك هاذي اك الحاجة لي يقولولها مكتوب..

نحسهم يجبدوها آخر كارطة بش يبرروا قرار ما يعرفوش علاه خذاوه!.. الراجل لي بش يجيني وحدو لتو ما ظهرش عملت التلاثين و ما طلش قداه عندي نستنى و قريب قلبي ينسى كيفاه يستنى فديت مالمستنية ماعاش عندي جاش بش نستنى حتى كان ما حبيتوش هالراجل نورمال المهم نعرس  شكان عليه كان بدلت رايي و عرست كيما عرست امي و عزيزتي اصلا خاطرني مرا عادي نبدل رايي احنا النساء نفس الحاجة لي تكون روحنا فيها في دقيقة نوليو نكفروا بيها كان مش هكاك رانا هبلنا من هاك العام

أي نحب نعرس اش فيها !! مرا راني! نبكي من اقل حاجة و كي تظلام في عينيا نحب سدر محلول يخبيني عندو! نحب شكون يخاف و يغير عليا نحب شكون يقصرلي ليالي الشتا الطويلة..نحب راجل! اي كهو عملت 30 سنا و لازمني راجل..فات الميعاد كيما تقول ام كلثوم و ما بقاليش جهد نعطي رنديفوات كهو ماعاش فيها نمشي نشوف لي قالتلي عليه امي! كان حبينا بعضنا بركات ماكانش وكان طلع باهي و تفاهمنا نعرس بيه !! و نعيش معاه رايضة نخدموا جمعة كاملة و نهار السبت نفطروا في دارهم و الاحد الصباح نمشيو نقضيو..العشية حاجة حلوة و كاس تاي.. في اليل دوش.. البس بيجاما .. كلاسط خشان.. و ارقد !! و يا ربي ليك الحمد ! خير من بلاش !! و نعيش مع راجل قالب ثلج؟؟ لا همزة لا لمزة لا غزرة لا توشويشة لا ضحكة لا تبسيمة؟؟ نعيش بقلب بارد ؟؟ محسوب، القلب البارد خير مالفرش البارد، و خير من عشية احد نقاسي الرزن متاعها وحدي..و خير من اخر العمر نعديه وحدي و خير ملي نخرج من هالدنيا من غير ما نسمع كلمة مامّا و خير من تقنقين امي كل يوم و غزرة في عينين بابا تقلي "نشالله ما نموت كان ما نطمان عليك" و ناس و مّالي يقولوا في قفايا "مسكينة بايرة" مش لازم الحب يكب سعد اياماتو مزلت متع حب انا و غيرة و تخمام و قهاوي عقابات الليالي!! قلبي بلاح و جلّد و حتى عمليات التجميل ماعاش ينفعوا في جد والديه.. انا هكاك و ضرب تاليفوني، تحمحمت الفين مرة و تلكونت في الحديث تلاثة والا اربعة مرات..و بصوت مبحاح عطيتو موعد،اليوم الستة متع العشية! 20 ديسمبر..نشالله كل عام و انا بخير..نشالله نحبو..نشالله هذا هو اخرة التعب..

_______________________________________

هاذي وجيعة برشا نسا وبرشا رجال خايفين من غول اسمو "العمر" لين يرميو رواحهم في فم غول اخر "العرس كيما جاء "  و فلخر و بش ما يلوموش رواحهم يقولوا مكتوب و يعرسوا بلا حب

و يجيبوا صغار بلاش حب و يكملوا عمرهم قلبهم بارد لين تموت فيهم كل حاجة عندها علاقة بالاحساس و يقولوا مكتوب

هاذي مش حكايتي اما يمكن انا بيدي خايفة لا يجي نهار و نقول مكتوب..