شنوة يصير لو كان نهربو؟ ما تضحكش نحكي بلحق راهو هيا نهربو نمشيو لبلاد بعيدة ما يعرفنا فيها حد والا لجزيرة مهجورة ما فيها حد.. يزي مالدك!! نمشيو لبلاد ما فيها كان انا و انت و بحر ممدود مزيان فلوكة صغيرة و نعديو النهار بين سما و ماء ازرق مالفوق و ازرق ماللوطة ماك تحب لزرق..

بلاد فيها غابة كبيرة نضيعو فيها ايي نضيعو و يشدنا الضحك حتى دموعنا تهبط و تصب علينا الشتاء نشطحو.. نضحكوا.. نجريو.. حتى حوايجنا تتبل و نلقاو دار سقفها و حيوطها لوح فيها شمينية نسهروا نتدفاو حذاها و تقعد للصباح تحكيلي ..

هيا نهربوا شبيك ديما خايف متحبش تجرب حاجة جديدة حل يديك و قلبك للدنيا تا تضحكلك نهربوا نهزوا معانا برشا كتبة برشا موزيكا و على خاطرك برشا ماكلة نهزوا مصورة بش نوقفوا بيها الوقت في اللحظات المزيانة بش كي نروحوا من هالحلمة نتفكروهم..

هيا نهربوا مالمسؤوليات الزايدة نعيشوا لحظة لينا نحنا كيف ما نحبوها احنا قداه عشت لروحك ؟؟ اماهم اللحظات لي عملت فيهم حاجة لروحك انت؟؟ وقيت بش تدلل روحك لي تاعبة معاك هالسنين الكل..

نهربوا و نسهروا في الليل ممدودين عينينا مرشوقة في السماء و نحسبوا في النجوم نستناو الشمس حتى تتطلع حتى تجي مالبلاصة البعيدة..

نهربوا شويا برك خالف القاعدة و خوذلي بخاطري..

نجموا نهربوا ببرشا طرق نجموا نهربوا واحنا في بلاصتنا نهربوا بمخاخنا و نجمو نهربوا سوايع برك..

المهم اهرب معايا اهرب ليا و متهربش مني الدنيا كان ضياقت عليك قلبي واسع ليك..