ها ها يا سيد وين داخل هكاكة لا بالك لا وسع شتحسابو قلبي؟ مو قبل ما تتبنبر فوق عرشو شاور مو لاباس داخل عليا بالحنية و المسايسة!! اسسمع الطلامس متاعك ما تمشيش مع طفلة راسها صحيح كيفي! تهننى لا غزرتك تجم تسحرني و لا كلامك العسلل بش يرهوجني

.. 

قد ما حوزت عروش قلبي ..و قد ما سلسلت بيبانو ...قد ما عليت اسوارو، و حطيت حراس داير ساير على حيطانو... قد ما خفت عليه منك  و قد ما بعدتوا عليك.. ، في اللخر حبيت.. طحت مالسماء جيت بين يديك!! هربت مالوجيعة والليعة ..مالقلب لي يتنهد ..مالعين لي تبكي ..مالناس لي تغدر... هربت ملي يقول و ما يصدقش، ملي يوعد و ما يوفيش، هربت مالحاجات هاذي و حاجات اخرى

..

كنت متخبية منك ياخي جيتني و في حضنك خبيتني و في عينيك حطيتني بضحكة ملايكة بقلب راجل.. بمخ كبيير و روح طفل صغير،بل هلالو هذا الكل، دخلت عليا..  و منجمتش نسكر الباب في وجك!! الحاجات هاذي، تجم تحل باب العرش، خلي يا بيبان قلبي الخايخة.. بيبان مخلوعة متع قلب موجوع

..
اما انت  مكش كيفهم!!انت حاجة اخرى، و بين يديك دنيا اخرى، بلاد جديدة.. لطفلة مضيعة بلادها قداه كنت مستحقتلك! حمدله جيت و انا قدامك نولي طفلة اخرى،طفلة صغيرة و مزيانة، طفلة عاقلة و دلولة، طفلة كيف م آ نت تراها، و كيف ما انت تحبها!! طفلة تولدت نهارت للي شافتك، و انت لي ربيتها على يديك.. طفلة ما تعرفها كان انت و ما تخرج كان قدامك..

كي نبدا معاك نسيبلك روحي، انت لي توكلني على ذوقك، و تمشيني في الشوارع لي انت تحبها، معاك انت نولي عمية.. ما نرى في حد كان انت، و ما عاد نعرف نعمل شيء كان ما تقلي انت! نضيع البوصلة و ننسى الوقت و الناس ولي يجي ولي ما يجيش..

و في وسط هالفرحة تضربلي نواقز الخوف !! خايفة لا بعد ما هزيتني فوق السحاب اتطيحني، خايفة لا نار حبك تحرقني، خايفتك لا ما هالحلمة تفيقني،خايفتك لا كيما دخلت من غير ما تشاور تخرج و ما تشاورشي خايفة لا فرحتي ما تكملشي.. خايفتك لا تمشي!! كيفاه يعطيك قلبك و تمشي بعد ما رجعت فيا الروح و بعد ما قطعت سلاسل الخوف امان ما تمشيش! امان كانك ناوي تمشي... هزني معاك!! "خليني جنبك خليني.. في حضن قلبك،وسيبني أحلم سيبني، ياريت زماني ما يصحنيش"..