تو عام ملي جاء و يا ليتو ما جاء؛ في عشوية شتاء.. المطر هابطة سلة سلة ..صوتها يهزك لدنيا اخرى، كدس ملفات مرصوصة قدامي، و انا مستعانه عليهم بقهيوة، و 'حيرت قلبي معاك '....فايلت على روحي بالحيرة..


دخلتلي السكرتيرة و قاتلي مدام الموظف الجديد جاء ضحكت كيفاه جاي عقاب عشية قلتها تتدخلهولي ما في باليش الي بش يدخل، هو فرحتي لي تفكت مني..و يا ليتو ما دخل!! انا ريتو و انا جمدت.. صوتي ضاع.. و نشني العرق...

و في دقايق حاجة فيّ حياتْ، حسيت هند بنت العشرين قامت في وسطي، قطعت سلاسل الزمان و ترمات في حضنوو.. سافرت في عالم آخر و رجعت عشرين سنا لتالي و تعداو قدام عينيا احلى خمسة سنين في حياتي بضحكهم ،بلعبهم، بدموعهم، بالشوارع الي درناهم و الشطوط لي حوسنا فيهم... ديما اليد في اليد.. بشتاهم و بردهم، بربيعهم بخريفهم..احلى خمسة سنين!!


فقت من دوختي قيت السكريتيرة تبحلق فييا و هو دايخ اعظم مني..منعرش منين جبت القوة بش نطقت و قلت لسكرتيرة برى على روحك و ما تدخلي حد جيت بش نقلو تفضل قيتو قعد...دقايق تعدات قولش سنين.. و لا واحد فينا نطق، حتى سمعتو قالي آش نو حوالك و مدلي دوسيه... دفنت راسي فهاك الدوسي عملت روحي نقرى فيه اما انا عاودت سرحت...


حوالي؟؟!! تقصد شنو حوالي من بعدك ؟؟ولا شنو حوالي بلاش بيك؟؟! والا تقصد كيفاه تعداو هالعشرين سنا !! بلحق كيفاه تعداو؟؟ كاينو البارح صارت الحكاية! كاينو البارح تفارقنا! الدنيا مخيبها والا زعمة العباد خايبين؟؟!.....المهم بلعت لكلام هذا الكل و قتلو الحمد لله! هو الواحد ديما يحمد ربي حتى على عمري الي تسرق منو،اما انا حبيت نقلو علآآاش؟؟ اش رجعك!!


!!السيد طلع جاي يخدم حذانا و بش يتربع على اك البيرو الي مقابلني كيف ما طول عمرو متربع على عروش قلبي..الدنيا فكتهولي و تو جابتهولي و حطتهولي قدامي بش نعدي معاه ثمنية سوايع عذاب كل يوم..الدنيا مخيبها !!النهاية عشيتها قعد يحكيلي على الغربة و على مرتو الفرانساوية الي طلقها و روح ببنتو و جاء بش يستقر في تونس كيما ما طول عمرو مستقر في قلبي...و انا حكيتلو على الراجل لي خذيتو شماته في روحي و عطيتو عمري و شبابي و هديت لروحي بيسان و يوسف احلى حاجة في حياتي صارتلي من بعدو...الدنيا مخيبها!! نهارتها ما حبيتش نروح حسيت وجهي يحكي في حكايتي و حسيت ترهويجتي فاضحتني و الحيرة ساكنتني آش بش تعمل يا هند؟؟ ..


قعدت ندور بالكرهبه بمخ سارح و عقل ضايع..ومن نهارتها كل يوم نصبح عليه و تبدلت حياتي و رجعت نلبس و نزين كي قبل و خرجت حوايجي الملونين و تلونت حياتي و تنفضت على فرحتي الغبرة و خرج شبابي من قاع بير.. رجعت نضحك للناس الكل و رجعت ماكلتي بنية و رجعت ضحكتي الي تزعزع الدنيا آلضحكة الي ما نضحكها كان كي نبدا شايخة و فرحانة..تصورو فقت لي عندي عشرين سنا ما فرحتش!! الدنيا خايبة مش؟؟ الدنيا حرمتني م الراجل لي حبيتو عشت بعدو ميتة، صمامة.. ما فقت بروحي كان بروبة بيضة و الناس تزغرط و انا قلبي يبكي..راجلي باهي و ولد ناس عشت معاه بالاحترام و القدر اما لي بيه الفايدة ما فماش!! و كي جاني اول طفل سميتو على اسم الراجل الي بعدوني عليه


تو عام ملي حياتي تقلبت..يا ليتك ما جيت! كنت في بالي بروحي عايشة فرحانة اما ملي ريتك فقت لي انا ما كنتش عايشة.. عام تعدى وانا نكذب على روحي و دافنة فرحتي نكذب على روحي و نقول لي جية يوسف الحقاني ما بدلت شيء ماني نعمل في شيء غالط!! اما اليوم فقت لروحي ولعايلتي و قررت شنرجع كل شيء لبلاصتو و نلم اوراقي الي تفرتت ...آليوم دخلت للشريكة الصباح خدمت كلعادة كي كملت تعديت عطيت استقالتي و خرجتو انا المرة هاذي، من حياتي ..


اما مش من قلبي،بعد الخدمة خرجت معاه خرجة وداع حسيتها من حقي!! آخر الليل وصلني لداري... بيديه، بين الجنة و النار خطوة..هبطت و سكرت الكرهبة بقوة ما نحب ننساه..و دخلت نجري للدار و قلبي يبكي زادة، و شديت يوسف عنقتو بش نودع يوسف الحقاني..و رجعت حياتي كيما كانت..علاه جايني عقاب عمري؟؟ فهمت تو علاه جاء عقاب عشية خاطرو راجل يجي ديما ممخر...الدنيا مخيبها

..