و غاضتني..عمركشي ريت حد تغيضو الناس اكثر ملي تغيضو روحو؟ غاضتني خاطرها كي النوارة،كي الشمعة الضواية،طفلة مزالت فرحانة بالدنيا،قد و قالب..ريت روحي فيها،حسيت بيها..طفلة صغرونة،وجه ملايكة و قلب طفلة صغيرة..مسكينة!

ما تعرفش اش يستنى فيها! ريتها ايي،ريتك...ريتكم..ريتك كيفاه تنصبلها في شباكك،ريتها كيفاه تتزعبن،كيفاه بدات تغرق و من غير ما تشعر،بيك تتعلق! و شكون ينجم يقاوم طلامسك و شكوني بنت امها لي تنجم تاقف قدامك..و كان ترجع بيا الدنيا ما نجم كان نعاود فيك نغرق! مسكينة!

هاك العوينات المليانة بالبراءة بش يتملاو بالدموع،هاك الوجه الضاوي بش يطفيه سهر الليالي،الخدود الحمر بش يتحفروا بسواقي الدمعات الحارة..اك الضحكة مالقلب بش تولي وجيعة منالقلب..طفلة شارقة كي الشمس في نهار ربيع..علاه تطفي فيها؟؟ مزاكش لي عملتو فيا؟؟ يا عزيزتي تحسابني هكا كنت؟؟ راك كي ريتني قلت "اووه انا ازين منها" ....... انا كنت فرحة ماشية على ساقيها،كنت دوب ما نحط راسي نرقد،كنت كي نقوم الصباح نقوم ناشطة و نغني.. كنت نظهر اصغر من عمري بعشرة سنين.. كي جاني قلت نقسم معاه الفرحة،قلت الفرحة كي تتقسم تزيد،و من حبي فيه عطيتو من غير ما نشعر الفرحة الكل،ياخي هزها و خلاني بلاش..و مشى يقسم فيها مع وحدة اخرى..غالطة ام كلثوم كي قالت اعطني حريتي!! اعطيني فرحتي رجعلي ضحكتي و توكل من حياتي و معاش نحب حتى بالصدفة نراك..اش وصلنا لهالحديث؟؟

حكايتنا كانت مزيانة و كنت نحبها توفى بلا سبان و تقشتيل! كنت نحبها تقعدلي حكاية نحكيها لبنتي قبل ما ترقد اما تو ولات حكاية و كان نحكيهالها لاما تكبر قبل عمرها و تبات تصيح في اليل..مسكينة..نشالله ترحمها و هي تتخبط في شباكك.. نشالله ترحمها و هي تصيح بكريزات غرامك..نشالله ما تضيعلهاش عمرها،نشالله ما تسرقلهاش فرحتها.. وانا .. انا قوية نتخبط شوية و نرجع ناقف على ساقيا بابا ربى طفلة و ساعات راجل..و نوريك بنت الرجال شتعمل!! والا لواه نكسر في راسي معاك،مزاش لي ضيعتو؟؟ ما تستحقش حتى بش ننتقم منك! مسكين و الله! في بالك بروحك تسخف؟؟

احنا نطيحو و نقومو اما انت ما عمرك ما شتقوملك قايمة! انا مش بش نزيد ندعي عليك خاطرك ما فيك ما يتدعى بيه! برى وخي ربي يوريني فيك عجايب صنعو!!! كنت نجم نقبل منك لو كان جيتني،حكيتلي،لو كان فهمتني لو كان رحمتني،تطلع في عيني و نقول حبيت راجل،و ما نندمش عالخير لي عملتو معاك! اما قدام عينيا تعمللها كيما كنت تعملي هاذي مش عملت رجال! و الخير لي عملتو معاك نشالله لربي و نشالله يتعرضلك..حاصيلو انستك بعقلك و مسيكنة اك الطفلة و مساكن الضحايا لي قبلي و لي بعدي! انا معاش مضيعة معاك وقتي و معاش تهمني في شيء..انا قطعت شباكك،و اليوم نخرج للدنيا،و اليوم نبرى و اليوم الضحكة ترجع و القلب مالاحزان يفرغ...

تحية مني باسم مئات البنات،للولاد لي يعملو في الشيء المذكور اعلاه برى يدبدب رايكم برى يطيح سعدكم!! و لكل بنية الشنتي لي كانت معاه عمل عملة كيما هاذي انا نقلها برى بنيتي

صلي ركعتين احمدي فيهم ربي خاطرو نجاك و مبروك عليك الشفاء D :