و قالي "انت طفلة سبيسيال" هههههه الكلمة هاذي فال خايب.. صدقوني..الرجال في تونس ما يعرسوش بالنساء السبيسيال.

يحبوا طفلة يتصدروا معاها،تلبس روبة بيضة توزن 656 كيلو و وزيدهم متع تلاثة كيلو مكياج..و شعيرات مصبوغين بل الاصفر و ظويفرات بالابيض،ضحاكة عاقلة دافية يعديو ايامات في سوسة والا الحمامات و يلم سويقاتو و يجيب الغشاشر و يمشيو نهار السبت يقضيو قضية الشهر و يتعداو يتعشاو في رسترون في حلق الواد..و بعد عويمين و الا تلاثة تولي..كيفها كيف البنك..و التلفزة و الفرجيدار..و اكثر من هذا،ينجم يسكتها هي و يحل التلفزة..

انت زعمة تونسي؟! تي لا ابار اك الجنسية الي مكتوبة في بطاقة التعريف..مخك زعمة كيفاه؟!

مانعرفش..اما انا منحبش نعيش معاك..برك.. منحبش نقسم معاك كان فرشك..و مشاكل الصغار و مصروف الدار..نحب نقسم معاك حاجات اخرين..

يمكن على خاطرني نحبك..نحب نقسم معاك الصباحات المغيمة و صوت فيروز الي جاي من راديو قديم شريناه مبعضنا من سوق الانتيكة مالشارع الي يشهد على كلمة مزيانة وشوشتهالي في وذني..

نحب نقسم معاك مطعم القهوة كي تعمالهالي بيديك،الي نحبها ناقصة سكر..مادامك معايا..نترشفها و انا سارحة فيك..في وجهك كي يبدا مكشبر عالصباح..في حزن مدفون في قاع عينيك..نحب نعدي معاك عشوية تحت البطانية..و انت تقرالي في كتاب بصوت عرفت معاه شمعناها حنية..نحب نعدي عشية كاملة نصنفلك و ننصبلك سفرة فيها كل حاجة انت شتهيتها في حياتك..و نستقبلك بالروبة كي لون الفراز لي حببني فيك..الي قتلي ما تخرج كان عليك..تخطفني بين يديك.. تخطفني و على دقات قلبنا تشطحني..تدوخني..تشيخني..تسيبي..و انا اصغر بعشرة سنين..

نحب نعيش معاك في بلاد اخرى..فيها ناس كل واحد فيهم سبيسيال..فيها موزيكا بنينة و ماكلات جديدة و وجوه فرحانة سعيدة..نحب نمشي معاك تحت المطر في قلب غابة مانعرفوهاش..و نضيعوا..و نجريو..و نشطحوا..نهبلوا..نطلعوا..نهبطوا..و كي نتعب،ترميني على ظهرك و تجري بيا.. صعيبة هاذي؟!

والا لازم نكون كيفي كيف الوجوه الكل بش ترضى عليا؟؟ و نقص مالهبال و نحاول نخمم باكثر عقل..و وقتها تتفسخ مني كل حاجة انت حبيتها فيا..خليني هكة و ما تاخونيش و خوذ قالب حاضر باش..و كي توصل للاربعين تو تتفكرني..تفكرك فيا ريحة برفان شميتها على مرا متعدية،قلبك دق و حسبتها..انا..تفكرك فيا غناية قديمة تسمعها في قهوة كنا نمشيولها مبعضنا.يفكرك فيا مطعم الفراز و وهرة الورد الشايح.. وصباحات سبتمبر المغيمة..تفكرك فيا تصويرة..لابسة فيها انا روبة قصيرة هديتهالي في عيد المرا و قتلي انت عندي احلى مرا..

انا ما نزيان كان معاك انت..عينيا الي ما يلمعو كان كي يشوفوك انت،و خصلات شعري لي يطوالوا كي تغزرلهم انت.. و خدودي لي يحماروا كي تقرصهم انت.. انت..انت راجل مفصل بالملي كيما تمنيت انا..انت باحلى و اخيب حاجة فيك..انا نحبك