عمري خمسة سنين عايش تحت التراب كل فجر نولد وردة لونها احمر بدمي عروشها مرسوم عليهم نجمة...كل نص نهار وردتي تفتح و تسال ...شكون قتلني ...نسكت و تتكمش ضلوعي تعاود تسال شكون قتلك يا شكري ...
يوجعني سؤالها ونجي باش نجاوبها نقولها ...

ولد بلادي يا وردة قتلني بالغدرة وكرطوش عمل ثنايا في بدني من راسي لصدري ... و التهمة حروفي اللي ننطقها كلمتي الحرة و كلامي الي يعريهم و حلمتي لجوانحها تلم تونس في شونها ....
و كي نحب ننطق ...

نتنهد و الغصة في قلبي تسكتني نبكي و نسقيها بدموعي كيف ما سقيت البلاد بدمي ...وبصوت عالي من تحت اللحود نجاوبها ...انا حي ...شكري حي البدن تزرع في الارض الي نعشقها و الروح تحوس في سماها و تنفخت في روح كل تونسي يتذكرني ....يمكن قص عليا النفس بكرطوشهم و قلبهم الاكحل و بدينهم المحرف ...اما كلامي... حلماتي ...افكاري ...ضحكتي ...مازلت تتسمع و تتحس ...

تتبسم الوردة و تقولي  ياشكري دموعك مطر تروي الارض ... و كلامك ينبت القمح في الصحراء احكي يا شكري احكيلي و خليني نشبع بكلامك اليوم خمس سنين ملي سكت صوتك و بقى صداها في وذنيهم ...احكيلي يا شكري ...

انا شكري ولدتني تونس و قتلني حبي لها ولناسها وساسها ....عشقي لشوارعها و كياسها..

نحبها هالارض الي عملنا على خاطرها ثورة ومن قبل الثورة و احنا نفديو فيها بدمنا بعرق جبينا و افكارنا متنا و تشردنا و تحبسنا سنين باش نشوفها حرة ...نحبها حتى كان فيها  من غدروني نمن بنشيدها و نقدس كل حرف فيه ...

6 فيفري 2013 زلزلت ترابها بصوتي دمي فايض و انا نغني نموت نموت و يحيا الوطن .....

نموت نموت و يحيا الوطن .....

ومت وتكفنت بعلمها وتقرى عليا نشيد ...أما تعرف يا وردة توحشت. ...توحشت نمشي على أرضها ندافع على كالزوالي المسكين الي نهبوه ونهشوه ندافع على الخدامة و نفكلهم حقوقهم و مانسكتش على الظلم.

..توحشت نسهر ليالي نخمم في حال البلاد توا نسهر ليالي نسأل في القمرة على حال الرفاق..وكل نجمة نكتب عليها حلمة. ...حلمتي كبيرة الف  وردة بالف لون... توحشت نعيط في شوارعها يلزمنا ناقفو لتونس ياوردة

قولهم ما يسلموش فيها تونس امنا العزوزة الي ربتنا قولهم الي كل ليلة تونس تجي تتمد بجنب قبري و تبكي و تطلب مني السماح على الذرية الفاسدة الي جبتها قولهم الي هيا تبرات منهم و قالت لاهم ولادي و حليبي و تعبي  حرام عليهم … انا شكري كان يرجع بيا الزمان نكتب على جبيني  و جبين تونس  و حرايرها

يا شعبي اه

الهيكل مصلوب في واد عدمهم

اه عالقلوب لو تصحى تثور توجعهم

تفيض الدروب تحطم عروش توابعهم

يا شعبي اه

زعما يعنيني لي قتلني

يا شعبي اه

والا من لي باع خذلني

يا شعبي اه واه واه واه

يا ملح عرڨ الكادحين

يا صبر الاه في الأڨدام الحفيانين

يا نار الآه ، لو تحرڨ ضلوع الخاينين ..

والبياعين .. لو بعد سنينيا ...شعبي اه