ليلة ليلة عيد ،لاقمرة ،لاهلال، لانجوم ، ليلة ليلتي أنا ماثمة حد غيري لاكواكب لا مجرات لا بنات حتى شئ غيري ...

ليلة يجيني و يهنيني ...

الأحمر كالدم على شفتي حطيت و الكحل نكحل ونعاود ونزيد ثماش مايشلق بيه ،غامق شماتة فيه و في الاكحل الي يغريه ،شعري على طولو مديت

عينيا تلصف قول ألماستين قوس قزح تربع فيهم ...

حوايج النوم رصفتهم ورشقتهم في البيت الأحمر،الاكحل والاخضر على العينين ،البيضة لتزعبين نخرج عليه ملايكة ويمشي الى بالو حور العين ...

الليلة ليلة عيد وعدني باش يجي ....

زعمة كي يدخل يلقاني قدام عينيه ...نتخبى ونعملو سوربريز ...

اما خير نطفي الضوء و الا نخليه ... نحملو نبوس و الا نطفيه...

نحط موزيكة والانخلي سكات باش نسمع تنفيستو و رعشة قلبو ويديه ...

ليلة ليلة عيد و كي يجي تاونقولك فيه....

هاني نستنى قلي الاربعة باش يجي تاو ثمنية اما اكيد درجين ويجي هذاكة مشى يجيبلي في كادو ،ورد ،شكلاطة ،امامدام بطء تعدى لك البوتيكات ليعجبوه و يجيبلي روبة نوم ،يفرح بيا وبيه...

الثمنية ،التسعة ، العشرة ...نصف اليل نطلب نشوفو وين ؟

كحلي ساح ،لحمر تمحى ... عينيا ذبالت وشعري تهلك ...سكات ملئ الدار و البرد جمد الحيوط ،ساقيا رزانت باش نمشي نشد بلاصتي .. حوايجي كرهوني و بكاو عليا  

نسيت ... نسيت انا راني لاني نومرو واحد و لاثنين باش يجيني يحبي على ساقيه أنا نومرو ثمنية وعشرين و اكيد باش يتذكرني في الفين وميتين وعشرين...

موش قتلك لشكون تكحل يا مرت الاعمى...