كي نبدل على خاطرك الزمان و المكان ..نكفر بالمكتوب ..لعلقنا في وسط الطريق واقفين نستناو  شنية باش يصير .. ، ماناش عارفين وين باش نوصل  ...و ننسى لتعلمت في الصغر على القضاء و القدر .. نبدل الحاجات لنمن بهم ..

نمن  كان بالمحبة لتزرعت فيا لك وحدك ...نقدس الرعشة الي في قلب كي نراك و نتمنى نتعنكش فيك ...و التراك و الترهويجة لتمكني  كي تطلبني  و معادش نفرز الي تهز ملي تعلق ..و نقدس التخلبيزة لتسكن فيا كي نبدى  جايتك في الثنية ... و نبدل الوقت لمقة  الحلمة وردها  كوشمار ..و نرى عشقتي لك تستحق اني نفنى حياتي عليها ...و نراها عشقة مالعشقات لمتتوجديش كل نهار و نعشقك و نشوف دينا زاهية بالوانك ...و نرى روحي ناقصة من غيرك ...

كي نصلي و مانتذكر  كان  ندعي لربي  باش ينسى لانتي موش ليا ...يبدل خطوط طريقنا و نتقابل ...نعيش الحلمة الي ليالي ساهرة نطرز في حكاياتها على ضوء القمرة ...و نتذكر كلام مماتي في الصغر كي تقولي  ماتبكيش كل حاجة تحبها  قوم في الليالي احكيها بصوت عالي لروحك و خليها طير في الفضاء تهرب منك و بعد تجيك و تتحقق...

كي نبدل هذا الكل و ما تكونش ليا ..

و تعرضني في ثنية مسكرة لا فيها لا هواء ،لا نفس و تخنقني بعشقتي لك ،تربط على رقبتي خيط محبتي لك....و تحكي كلام بين سطور لانتي تحب !!!..تحب غيري و تحلم معاها ومالقيت

كيفاش تقولي ...خبيتها و مالقيتش شجاعة باش تصدمني وليت زينتها في وسط بوكي متاع كلام حطيتها كالقنبلة طرشقت في وجهي وحدي....
كي تخليني معلقة في شفرة حلمة  ولا ت كوشمار ....

ناقف قدام مرايتي عريانة ...مدقدقة...مرمدة...مشوهة من حلمة ماتت...  

و نكرهك قد محبتي لك ومحبة الناس لبعضهم ...و نلم المحبة بالكره و على قد هم نعاود نعشقك ...و نحبك ...و نضيع معادش نعرف محبة من كره.... و نشد فرشي ايامات و ليالي....نخزر لسقف و نسال روحي نفس السؤال كل ثانية و ننسى الكلام و الحروف و نبقى نتذكر كان هالحروف الي  في سؤال  شنية فيا مايتحبيش؟؟؟!!! شنية لي خلاني نكون بعيدة ؟؟؟  
و في لحظة نفرعن ...و ننسى المنطق و الي يجي و الي ما يجيش...و كيف مابدلت الثانيا و طرزت حلمة على قد ي و قدك ...نبدلك انتي شماتة فيا ...و فيك ...شماتة في كل لحظة تمنيت نعيشها معاك و قتلتها..شماتة في غزرة محبة من راجل لمرا تمنيت نراها منك و حرمتني منها..نعفس على قلبي كيف بنات حواء الكل الي كي تتوجع تبدل بشماتة و نبدلك بغيرك موش باش نغيرك و الى باش نخليك تعرف قيمتي لا ...

اما باش نعيش نهار في داموس الجنة مع غيرك ...يشبهلك في حاجة وحدة انو راجل و نجم نعمل معاه اش نحب و نشتهى فيك...نقولو لكلام لتغرس في قلبي كي حب يتنطق تشنق على شفايفي ...

و نسيه لانا مازلت كي ريتو ...

نكذب عليه و يكذب عليا يقولي لهو رتاحلي من اول ماراني ...و نكسر حيوط التعارف الماسطة و اللاسطة و كالاسئلة التافهة .. مانحب نعرف على بعضنا شي .و يزي هو ليعرف علي خلات في وسط الطريق ...و لنعرف انا عليك ياحلمة ضايعة  بين النجوم ،ماتت و دفنت في الرمل و هزتها موجة بحار هارب من الهم ...فاصع مالمحبة لتذل ..

و نقابل كل يوم كيف ماتمنيت معاك نعيش ...و نشد بحكايات لوجوه الفجر ..و نحكيلو على قد السوايع لعديتهم ساكتة ...و نجبد مالمخبل في كبة و نحكي و طز في الي باش يخمم عليا...
نحكيلو  على صغري ...حلماتي لكبار لحبيت نعيشهم معاك و انتي ذبحتهم بسكينة حافية ...اما نحكيهم بلهفة و محبة ..بلمعة  في العين و رعشة في الصوت .،،كيني عمري مادفنتهم ...
و نتعلم نكتب على روحي لانا  احلى طفلة تنجم تتحب ...

و نخليه يمن بيا  و يفرح لا نا احذاه ... و نقيم في انصاف اليالي باش يبعثلي بوسة كيف الكوبلوات الكل ...و يطمني لهو هنا بجنبي و نتخيل صوت ...صوتك و نقول لانا نحب ...موش خاطر انا نحب و الى هو يحبني اما خاطر كل واحد فينا يحب يحس احساس ان تتقال كلمة نحبك و يسمعها  حتى كان مادقيش قلب ليها المهم ماهو ش وحدو  و هاو سمعها ... و نبعثلو  ميساج فيه بيبي فطرت في نصف النهار كيف لريتها بعثتهولك كالنهار و انتي  بجنبي.. و شماتة فيك نعيش معاه الي انتي عشت مع غيري الا يا ما ت الي  انا نتمنى نعيشهم معاك...و نتكى على ساقيه و نرمي شعري على طول و نقلو العبلي بشعري...و نسكر عينيا و نراك قدامي ...و نسيب دموعي ...نبكي بشهقة كينها اليوم دفينتي ....

و نتخبى في صدر و و كي قولي علاش تبكي نحكيلو على خوفي ...خوفي اني نتنسى ...نغبر ...نضيع ...نتكتف بغبار النسيان  و بعد نتسيب ...و نسيب كالصبية الي فيا لشكت في روحها كي انتي ماحبيتهاش ...ندلل و نتعلم تزعبين على يديه...و نخليه يحمد ربي نهار و ليل لانا بين يديه... و نشلق به يكذب و نطفي الضوء ..هو يحلم بتصويرة محبة ووحدة تقسم معاه كل لحظة حتى كان مايحبهاش المهم موش وحدو  المهم ثمة شكون  ثمة تصويرة فيها زوز ...و يهرب مالدنيا  و نهرب معاه و نسكرو علينا  باب الحلمة لنحب نعيشوها ...و في لحظة هذيكة يولي عادي نتفنن في تشويه   الاحساس ..المحبة ...خاطر لنحب  مايحبناش و الى مشى و خلانا في وسط ثنية  ظلام ...هازين سوفنير متاع و مع كل حد نرميو شوية منها باش ننساو و شي عمرنا ماننساو ...نتعلم نعيش في داموس الجنة ...بعد ماحلمنا بالجنة معاه... حلمنا ببرشة

حاجات نقسموهم و نعرفهم اول مرة و نجربهم اول مرة مع الي نحبه و بعد...نحققهم مع غير ...مع كالعبد الي يدخل لحياتنا بعد بضبط ... و شماتة فيك نوشم بوسات على رقبة و نكتب اسمي على صدر و ...و نغدر  هو يطيبلي في قهوة بتحميلة قوية ...كيف هذيكة لقداش من مرة تمنيتك تحملهالي، وهو شماتة في المحبة يدور و يحملني الفوق و يسرق بوسة بين هواء و فضاء.... و كل صباح نجبد حكة الاحلام لكتبتهم بالغصة لك و نبدل اسمها داموس الجنة و كل يوم نحقق حلمة منهم معاه و نعيش فازات المحبة و تفاصيلها الصغيرة من كلام و حروف و ميساجات و لهوة من غير احساس ...و نفهم للمحبة تتعاش في داموس الجنة ...كل شي موجود كان الاحساس...